Parlament Májilisi "Qazaqstan Respýblikasynyń áleýmettik qamsyzdandyrý máseleleri jónindegi keibir zańnamalyq aktilerine ózgertýler men tolyqtyrýlar engizý týraly" zań jobasyn maquldady, - dep habarlaidy "Ult aqparat".
Eńbek jáne halyqty áleýmettik qorǵaý ministri Tamara Dúisenovanyń aitýynsha, bul zań jobasy Prezidenttiń tapsyrmasyn oryndaý maqsatynda daiyndaldy. Zań jobasyna sáikes, zeinetaqy týraly zańnamaǵa birneshe ózgertý engizildi.
"Memleket basshysynyń tapsyrmalaryna sáikes, zeinetaqy mólsheri úsh esege kóbeiedi. Birinshi kezeńde, iaǵni 2017 jyldyń 1 qańtarynan bastap yntymaqty zeinetaqy mólsheri 9 paiyzǵa, al bazalyq zeinetaqy 7 paiyzǵa ósti. Ekinshi kezeńde, 2017 jyldyń 1 shildesinde yntymaqty zeinetaqy mólsheri 20 paiyzǵa deiin ósse, bazalyq zeinetaqy 13 paiyzǵa kóbeiedi. Nátijesinde 2017 jyldyń 1 shildesinen bastap zeinetaqy 2016 jylmen salystyrǵanda 20 paiyzǵa ósedi. Zeinetaqynyń minimaldyq mólsheri 40 myń 950 teńge bolady. Bul barlyq zeinetkerge qatysty, iaǵni 2 millionnan asa adamǵa", - dedi ministr Tamara Dúisenova.
Onyń aitýynsha, bazalyq zeinetaqy zeinetkerlerdiń 1998 jylǵa deiingi eńbek ótilinen bastap eseptelinedi. Iaǵni, zeinetkerlerge eńbek ótili jaily qosymsha qujattar jinaý kerek emes.
Onyń sózine qaraǵanda, ústimizdegi jyly zeinetaqy mólsheriniń 20 paiyzǵa deiin artýyn eskere otyryp, zań jobasynda bazalyq zeinetaqynyń eń tómengi mólsherin kúnkóris deńgeiinen 50-den 54 paiyzǵa deiin ulǵaitý usynylyp otyr. Osylaisha, 2018 jylǵy 1 shildeden bastap bazalyq zeinetaqy mólsheri, azamattardyń eńbek ótili jáne jinaqtaýshy zeinetaqy júiesine aýdarymdar kezeńi: 10 jyldan aspasa, onda eń tómen kúnkóris deńgeiiniń 54 paiyzyn; 20 jyl bolsa - eń tómen kúnkóris deńgeiiniń 74 paiyzyn; 33 jyldan asqanda - eń tómen kúnkóris deńgeiiń 100 paiyzyn quraidy.
«Nátijesinde, eńbek ótili men jinaqtaýshy zeinetaqy júiesine neǵurlym kóp qatysqan azamattardyń zeinetaqysy joǵary bolady. 2018 jylǵy 1 shildeden bastap 2 mln zeinetkerdiń: 44,7 paiyzy eń tómen kúnkóris deńgeiiniń 74 paiyzynan joǵary alatyn bolady; 45,2 paiyzy eń tómen kúnkóris deńgeiiniń 100 paiyzyn alady nemese bazalyq zeinetaqysy búgingige qaraǵanda 2 ese kóp bolady dep kútilýde», - dep naqtylady ministr.
Vedomstvo basshysy atap ótkendei, 2018 jyldan bastap jumys berýshilerdiń óz qyzmetkerleriniń paidasyna 5 paiyz jarnalary esebinen qalyptastyrylatyn shartty-jinaqtaýshy komponentin engizý kózdelgen bolatyn. Qalyptasqan ekonomikalyq ahýaldy eskere otyryp, zań jobasynda jumys berýshiniń mindetti zeinetaqy jarnalaryn engizý merzimin 2018 jyldan 2020 jylǵa aýystyrý qarastyrylǵan.
Budan basqa, zań jobasynda balaly otbasylardy memlekettik qoldaýǵa baǵyttalǵan normalar qarastyrylǵan. Birinshiden, bala týýyna bailanysty beriletin birjolǵy járdemaqy mólsherin 20 paiyzǵa arttyrý kózdelgen. Járdemaqy mólsheri birinshi, ekinshi, úshinshi balaǵa 31,41 ailyq eseptik kórsetkishten 38 ailyq eseptik kórsetkishke deiin (71 270 teńgeden 86 222 teńgege deiin), tórtinshi jáne odan kóp balaǵa 52,35 ailyq eseptik kórsetkishtiń 63 ailyq eseptik kórsetkishke deiin (118 783 teńgeden 142 947 teńgege deiin) artatyn bolady.
Elimizde jylyna 400 myńdai bala dúniege keletinin eskersek, shamamen 300 myńnan astam otbasy arttyrylǵan mólsherde járdemaqy alady. Nátijesinde, 2017 jyly járdemaqynyń mólsheri 2016 jylmen salystyrǵanda 27 paiyzǵa artady.
Eske sala keteiik, osyǵan deiin 2017 jyly bala týýyna bailanysty beriletin járdemaqy men zeinetaqy mólsheriniń qalai ósetini belgili bolǵan edi. Sonymen qatar, Ministr 2,1 millionǵa jýyq zeinetkerdiń zeinetaqysyn arttyrý maqsatynda respýblikalyq biýdjetten qosymsha 79,8 milliard teńge bólinetinin atap aitqan bolatyn.
