Foto:elements.envato.com
Parlament Májilisi Ulttyq qordan balalarǵa tólem jasaý máseleleri týraly zańdy ekinshi oqylymda qabyldap, Senatqa joldady. Joba 2024 jylǵy 1 qańtarda iske qosylady, dep habarlaidy Sputnik Qazaqstan saity.
Zańǵa sáikes, Ulttyq qordyń jyldyq investitsiialyq kirisiniń 50 paiyzy balalar 18 jasqa tolǵanǵa deiin olardyń arnaiy jinaq shotyna aýdarylady. Bul aqshany olar bolashaqta baspana satyp alýǵa nemese bilim alýǵa jumsai alady. Bul rette qarajatty sheteldik joǵary oqý ornynda oqý úshin paidalanýǵa ruqsat etiledi.
"Bala 18 jasqa tolǵanǵa deiin aýdarylǵan aqsha Ulttyq qorda bolady jáne Ulttyq bank ony qarjy quraldaryna investitsiialaýdy jalǵastyrady. Barlyq balaǵa teń tásil qamtamasyz etiledi, iaǵni balanyń týǵan kúninen bastap nemese balanyń Qazaqstan azamattyǵyn alǵan kúninen bastap on segiz jasqa tolǵanǵa deiin onyń baǵdarlamaǵa qatysqan tiisti jyly úshin árbir balanyń shotyna birdei soma aýdarylady", - dedi zań jobasy boiynsha baiandama jasaǵan májilismen Berik Beisenǵaliev.
Shotta jinalǵan aqshany 18 jasqa tolǵannan keiin ǵana paidalanýǵa bolady. Alaida bala azamattyǵyn ózgertken nemese joǵaltqan jaǵdaida tólem alý quqyǵynan aiyrylady. Ulttyq qordan beriletin qarajatqa salyq salynbaidy.
Aita keteri, "Ulttyq qor – balalarǵa" jobasy 2024 jylǵy 1 qańtardan bastalady. Májilis depýtattary zańdy ekinshi oqylymda qabyldap, Senattyń qaraýyna joldady.
