Foto: Sputnik / Mihail Mordasov
Májilis depýtaty Ardaq Nazarov Túrkistan qalasynda araq-sharap satýǵa tyiym salýdy usyndy, dep habarlaidy Ult.kz Sputnik Qazaqstanǵa silteme jasap.
Búgin parlamenttiń tómengi palatasynda Túrkistannyń erekshe mártebesi týraly zań jobasy qaraldy. Depýtat Ardaq Nazarov osy zań aiasynda qalada araq satýǵa da, ishýge de tyiym salýdy usyndy.
"Óitkeni Túrkistandy rýhani astana dep otyrmyz. Búkil qazaq osy jerden rýh alýy kerek, ol jerde babalarymyz, áýlie, batyr bilerimiz jatyr. Erteń shetelden kóp qonaq keledi. Sol kezde bizdiń azamattarymyz araq iship, aldynan shyǵatyn bolsa, uiat qoi. Sondyqtan osy zań aiasynda araqsyz qala, rýhani qala dep, araqqa tyiym salýǵa bola ma?", - dedi Nazarov.
Túrkistan oblysy ákiminiń orynbasary Beisenbai Tájibaevtyń aitýynsha, oblysta "Ishimdiksiz aýyl" jobasy qoldaý tapty. Oǵan bir jyldyń ishinde 30 aýyl qosyldy.
"Bul bastama Túrkistan qalasynda da jergilikti ziialy qaýymmen, aqsaqaldarmen, qoǵam belsendilerimen talqylandy. Degenmen Túrkistannyń negizgi rýhani-mádeni baǵytymen qatar týristik basymdyq da bar. Sol sebepti biznes ókilderiniń tarapynan ol máselege de túrli kózqaras qalyptasyp otyr. Atalǵan másele oryndy. Aldaǵy ýaqytta zań jobasyn qabyldap jatqannan keiin bul máseleni de tiisti zań normalary aiasynda qarastyrý qajet dep sanaimyz", - dedi Tájibaev.
