QR Parlamenti Májilisiniń spikeri Nurlan Nyǵmatýlin koronavirýske bailanysty oqshaýlaný týraly sheshim qabyldady. Qazir ol qashyqtan jumysyn jalǵastyrýda, dep habarlaidy "Ult aqparat".
«Májilis Tóraǵasy karantindik sharalardy qatań saqtap, jalpy otyrystardy qospaǵanda eshkimmen tikelei bailanysta bolmady.
Sonymen qatar, Nurlan Nyǵmatýlin árbir jalpy otyrys saiyn koronavirýsqa test tapsyrdy.
Aǵymdaǵy jyldyń 9-11 maýsymy aralyǵynda Májilis Tóraǵasy «Halyq densaýlyǵy jáne densaýlyq saqtaý júiesi týraly» Kodeksiniń jobasyna Senat engizgen túzetýlerge bailanysty Densaýlyq saqtaý ministrin qabyldaǵan bolatyn.
Eljan Birtanovtyń oń saraptamasyna bailanysty, 16 maýsymda Májilis Tóraǵasy taǵy bir synaqtan ótti. Ókinishke orai, test oń nátije kórsetti. Diagnoz simptomsyz túri dep qoiyldy.
Osyǵan orai, Nurlan Nyǵmatýlin ózin-ózi oqshaýlaý týraly sheshim qabyldady.
Qazirgi ýaqytta Májilis Tóraǵasy qashyqtyqtan jumysyn jalǵastyrýda. 17 maýsymda ótetin Májilistiń jalpy otyrysyn vitse-spiker ótkizýde», - delingen Májilis aqparatynda.
Eske sala ketsek, Densaýlyq saqtaý ministri Eljan Birtanov koronavirýs juqtyrǵany habarlanǵan bolatyn.
12 maýsymda QR Premer-Ministri Asqar Mamin Jambyl oblysyna jumys saparymen baryp qaitqan. Onda Densaýlyq saqtaý ministri E. Birtanov ta bolǵan. Osyǵan bailanysty Úkimet basshysy oqshaýlanýǵa májbúr bolyp otyr.
Áriptesterimen birge Bilim jáne ǵylym ministri Ashat Aimaǵambetov, Aýyl sharýashylyǵy ministri Saparhan Omarov pen QR Ekologiia, geologiia jáne tabiǵi resýstar ministri Maǵzum Myrzaǵaliev óz úilerinde oqshaýlandy.
