Parlament Májilisiniń tóraǵasy Erlan Qoshanov qańtardaǵy jappai tártipsizdikter boiynsha tergeý nege uzaq ótip jatqanyn túsindirdi, dep habarlaidy Sputnik Qazaqstan.
"Nege uzaq? Nebári eki ai ótti. Bul aýqymdy terakt qoi. Myńdaǵan adam qatysty. Munyń bárin egjei-tegjei dáleldeý qajet. Adamǵa aiyp taǵý úshin búkil aiǵaqty jinaý kerek. Sol sebepti bul - óte úlken jumys. Men bul tez aiaqtalady dep oilamaimyn", - dedi Qoshanov Májilis kýlýarynda jýrnalister suraǵyna jaýap berip.
Osy oraida spiker 2011 jyly eki terakt uiymdastyryp, 77 adamdy óltirgen norvegiialyq mergen Anders Breiviktiń oqiǵasyn mysalǵa keltirdi.
"Norvegiialyq mergendi eske túsireiikshi. Bári ap-aiqyn dáleldendi, beinekameralardan kórinip turdy, kýágerler boldy, ol da kinásin moiyndady. Biraq soǵan qaramastan tergeý bir jylǵa sozyldy, taǵy jarty jyl sot boldy. Bir jarym jyl – bul tek bir adamnyń qylmysy. Al bizde mundai aýqymdaǵy tártipsizdikter elimizde bolǵan emes. Sondyqtan bul óte úlken jumys, onymen prokýratýra men quqyq qorǵaý organdary ainalysyp jatyr", - dep túsindirdi Májilis tóraǵasy.
Qańtar oqiǵasy
Jappai tártipsizdikter biyl qańtar aiynyń basynda boldy. Tártipsizdikter suiytylǵan gaz baǵasynyń eki ese qymbattaýyna qarsy jappai narazylyqtan bastaldy. 2 qańtarda Jańaózen qalasynda mitingi ótip, artynan Aqtaý, Atyraý jáne Qazaqstannyń basqa da qalalarynda olarǵa qoldaý bildirdi.
Alaida beibit mitingiler jappai búlikke ulasyp ketti. Ásirese odan Almaty qalasy qatty zardap shekti. 5 qańtarda qarýly adamdar qala ortalyǵyn qiratyp, qala ákimdiginiń ǵimaraty men jaqyn mańdaǵy prezident rezidentsiiasyn órtep jiberdi. Politsiia ǵimarattaryna, UQK jáne basqa da áskeri nysandarǵa shabýyl jasaldy.
Taldyqorǵan, Shymkent, Qyzylorda, Taraz qalalary da zardap shekti.
