Parlament Májilisiniń jalpy otyrysynda «Bir taraptan Eýraziialyq ekonomikalyq odaq pen oǵan múshe memleketter jáne ekinshi taraptan Serbiia arasyndaǵy erkin saýda týraly kelisimdi ratifikatsiialaý týraly» zań jobasy maquldandy, dep habarlaidy "Ult aqparat".
Osy Kelisim kedendik ákelý bajdaryn alyp tastaý jáne birqatar taýardy bajsyz ákelýge kvota berý arqyly Eýraziialyq ekonomikalyq odaqqa múshe memleketter men Serbiia Respýblikasy arasyndaǵy ózara saýdany jaqsartý úshin jaǵdai jasaýǵa baǵyttalǵan.
«Qazirdiń ózinde Qazaqstan, Belarýs jáne Reseide Serbiia Respýblikasymen erkin saýda týraly ekijaqty sharttar qoldanylýda. Eýraziialyq ekonomikalyq odaqqa Armeniia men Qyrǵyzstannyń qosylýyna bailanysty 2015 jyly barlyq bes memleketke biryńǵai saýda rejimin ornatý qajettiligi týyndady», - dep túsindirdi Saýda jáne integratsiia ministri Baqyt Sultanov.
Onyń aitýynsha, jańa kelisimde eki jaqty bajsyz saýdamen qarastyrylǵan taýarlar tizbesi ulǵaiady. Osylaisha, Eýraziialyq ekonomikalyq odaq elderi Serbiiaǵa irimshik, alkogoldik ishimdikter jáne temeki taýarlaryn bajsyz jetkize alady. Burynda bul taýarlarǵa importtyq baj salyqtary salynǵan.
«Eýraziialyq ekonomikalyq odaq elderi de serbiialyq irimshikke, temekige, brendige ishki naryqqa qol jetkizý sharttaryn jaqsartty.
Sonymen qatar, ishki naryqty qorǵaý maqsatynda Eýraziialyq ekonomikalyq odaq qus etin, qantty, matalardy, alkogoldi ishimdikterdi, temekini ákelýge, sondai-aq kompressorlar men motorly kólik quraldary siiaqty birqatar ónerkásiptik taýarlarǵa importtyq baj salyǵyn qoldanýdy saqtaidy. Aityp ótetin taǵy da bir jait jańa Kelisimniń artyqshylyqtarynyń biri – ony Dúniejúzilik Saýda Uiymynyń negizgi normalarymen tolyqtyrýǵa qatysty. Atap aitqanda, kelisimniń taraptary sanitariialyq jáne fitosanitariialyq sharalardy, tehnikalyq retteý sharalaryn qoldaný jolymen ózara saýdada artyq kedergiler jasamaityn bolady jáne ziiatkerlik menshik obektilerin qorǵaýǵa kepildik beretin bolady», - dedi ministr.
Kelisim taraptary ózara saýdada ulttyq rejim jáne barynsha qolaily rejim siiaqty Dúniejúzilik Saýda Uiymynyń negizgi qaǵidattaryn qoldanýǵa mindetti bolady. Osy Kelisimdi iske asyrý Eýraziialyq ekonomikalyq odaqqa múshe memleketterde óndiriletin taýarlardy ótkizý naryǵyn keńeitýge múmkindik beredi. Atap aitqanda, qazaqstandyq taýarlardyń Serbiiaǵa eksportyn ulǵaitý áleýeti 250 mln AQSh dollaryn quraidy. Osy oraida munai-himiia, himiia, mashina jasaý, metallýrgiia, qurylys jáne azyq-túlik taýarlary siiaqty salalar eskerilgen.
