Májilis depýtattary bala quqyqtaryn qorǵaý týraly Zań jobasy boiynsha Senattyń túzetýlerimen kelisti jáne eger onda balalarǵa arnalǵan kiberbýllingke jol berilgen bolsa, áleýmettik jelini tolyq buǵattaý múmkindigin joidy, - dep habarlaidy Tengrinews.kz agenttigi.
"Senattyń túzetýleri balaǵa ziian keltiretin, tyiym salynǵan nemese ózge de túrde taratylýy shektelgen aqparatty ornalastyrýǵa jol bergen Internet-resýrstarmen memlekettik organdardyń ózara is-qimyl jasaý tetigin ózgertýge baǵyttalǵan.
Senat depýtattary buqaralyq aqparat quraldary salasyndaǵy ýákiletti organǵa balaǵa qatysty kiberbýlling faktileri boiynsha saraptama júrgizý tártibin aiqyndaý quzyrettin berýdi, sondai-aq kiberbýlling faktilerin internet-resýrstarǵa qol jetkizýdi toqtatýǵa negiz bolatyn zańmen bekitýdi usyndy. Bul rette, zań jobasynan ýákiletti organnyń tyiym salynǵan aqparatqa qol jetkizýdi shekteý tártibin aiqyndaý jónindegi quzyreti alynyp tastaldy.
Tutastai alǵanda, Senat usynǵan ózgerister men tolyqtyrý Májilis maquldaǵan zań jobasynyń tujyrymdamasy men mazmunyn ózgertpeidi", - dedi depýtat Jámila Nurmanbetova Májilis otyrysynda.
Depýtattar túzetýlerdi qoldap, daýys berdi.
"Zań jobasynyń tujyrymdamasyn biryńǵai túsiný - bul bizdiń balalarymyzdy qorlaýdan qorǵaý. Senat eki erejeni naqtylady. Birinshisi - kiberbýllingti anyqtaý boiynsha saraptamalyq komissiia qurý, ekinshisi - kiberbýllingke qatysty materialdardy ǵana joiý. Bul usynystar Májilis usynǵan tásilderge tolyq sáikes keledi. (...) Qyzý talqylaý, pikirtalastar boldy, avtorlar zań jobasynyń normalaryn printsipti túrde qorǵap, osy normalardyń progressivtiligin túsindirdi. Osy kúrdeli zań jobasyn talqylaýdy aiaqtaimyz", - dedi Májilis Spikeri Erlan Qoshanov.
