Májilistiń jalpy otyrysynda «Semei iadrolyq qaýipsizdik aimaǵy týraly» zań jobasy birinshi oqylymda maquldandy, dep habarlaidy QazAqparat.
«2008 jyldan bastap qazirgi ýaqytqa deiingi aralyqta Ulttyq iadrolyq ortalyq poligon aýmaǵynyń 100 paiyzyn tekserip, 2 millionnan astam ólsheý júrgizdi jáne topyraqtyń 5000-ǵa jýyq úlgisine taldaý jasady. Biyl tekserý materialdary memlekettik ekologiialyq saraptamaǵa jiberiletin bolady, sodan keiin poligonnyń shartty taza jáne normativten tys lastanǵan jerleriniń shekaralary aiqyndalatyn bolady. Olardyń boljamdy aýdany sáikesinshe 8900 km2 jáne 9400 km2 quraidy. Buǵan deiin aitylǵandai, lastanǵan jerlerdi tiimdi basqarý maqsatynda olardyń aýmaǵynda Semei iadrolyq qaýipsizdik aimaǵyn qurý usynylady», - dedi QR Energetika ministri Bolat Aqsholaqov.
Onyń aitýynsha, zań jobasynda ýákiletti uiymǵa qurylatyn aimaqtyń aýmaǵynda iadrolyq qarýdy taratpaý rejimin qamtamasyz etý, radioaktivti lastanǵan jerlerdi ońaltý jáne olardyń qaýiptiligin tómendetý, tarihi radioaktivti qaldyqtarmen jumys isteý ári radioaktivti lastaný deńgeiin monitoringileý fýnktsiialaryn berý usynylady.
Iadrolyq qaýipsizdik aimaǵynyń sheginde zań jobasynda kózdelmegen qyzmetti júzege asyrýǵa tyiym salý engiziledi.
Bul radioaktivti qaldyqtardyń mamandandyrylǵan aimaqtan tys jerlerge taralýyna jol bermeýge jáne sonyń saldarynan halyqtyń sáýlelený múmkindigin boldyrmaýǵa múmkindik beredi.
Sonymen qatar jalpy otyrysta «Qazaqstan Respýblikasynyń keibir zańnamalyq aktilerine Semei iadrolyq qaýipsizdik aimaǵy máseleleri boiynsha ózgerister men tolyqtyrýlar engizý týraly» ilespe zań jobasy da birinshi oqylymda maquldandy.
«Negizgi zań jobasyn iske asyrýdy qamtamasyz etý maqsatynda ilespe zań jobasymen Jer jáne Ekologiia kodeksterine ózgerister men tolyqtyrýlar engizý kózdeledi. Atap aitqanda, Jer kodeksiniń «ónerkásip, kólik, bailanys jeri, ǵarysh qyzmeti, qorǵanys, ulttyq qaýipsizdik muqtajyna arnalǵan jer jáne aýyl sharýashylyǵyna arnalmaǵan ózge de jer» sanatyn «iadrolyq qaýipsizdik aimaǵynyń jerimen» tolyqtyrý. Budan basqa, qajetti quqyqtyq rásimderdi bekitý úshin zań jobasy Bosalqy jerdi «iadrolyq qaýipsizdik aimaǵynyń jerine» aýystyrý tártibin ázirleý men bekitýdi kózdeidi. Sondai-aq iadrolyq qaýipsizdik aimaǵynyń jerin Semei iadrolyq qaýipsizdik aimaǵynyń jumys isteýi jónindegi ýákiletti uiymnyń jer paidalanýyna berý múmkindigi kózdeledi», - dedi vedomstvo basshysy.
Onyń paiymynsha, osy zań jobasyn qabyldaý tutastai alǵanda ekologiia, halyqtyń radiatsiialyq qaýipsizdigi máselelerine oń áser etedi.
«Poligonnyń radioaktivti-qaýipti qaldyqtaryna ruqsatsyz qol jetkizý men taralýyn shekteýge múmkindik beredi jáne qandai da bir quqyqtyq jáne áleýmettik-ekonomikalyq teris saldardyń týyndaýyna ákep soqpaidy dep sanaimyz», - dedi ol.
