Búgin Májilis Spikeri Nurlan Nyǵmatýlinniń tóraǵalyǵymen Palata Biýrosy ótip, onda aldaǵy jalpy otyrystyń kún tártibi naqtylandy, dep habarlaidy "Ult aqparat" Májilistiń baspasóz qyzmetine silteme jasap.
Májilis birinshi oqylymda «Qazaqstan Respýblikasynyń Úkimeti týraly» Konstitýtsiialyq zańǵa ózgerister engizý jáne Memleket basshysynyń 2020 jylǵy 1 qyrkúiektegi «Jańa jaǵdaidaǵy Qazaqstan: is-qimyl kezeńi» atty Qazaqstan halqyna Joldaýynyń jekelegen erejelerin iske asyrýǵa qatysty zań jobasyn talqylamaq.
Sonymen qatar, Palata birinshi oqylymda týristik qyzmet, normashyǵarmashylyqty jetildirý máseleleri boiynsha túzetýler jáne advokattyq qyzmet pen zań kómegine qatysty depýtattyq zań jobalaryn qaraityn bolady.
Aldaǵy jalpy otyrysta ortalyq jáne jergilikti memlekettik organdar arasynda aýyzsýmen jabdyqtaýdy sýbsidiialaý jónindegi ókilettikterdiń arajigin ajyratý máseleleri boiynsha depýtattyq zań jobasy birinshi oqylymda qaralady dep josparlanýda.
Sondai-aq, depýtattardyń qaraýyna dene shynyqtyrý jáne sport máseleleri boiynsha zań jobasy da usynyldy.
Biýronyń kún tártibiniń jobasynda Májilis depýtattary ekinshi oqylymda birqatar ekologiialyq zań jobalaryn qaraidy. Olar Ekologiialyq kodekspen oǵan ilespe zań jobalary.
Ekinshi oqylymda qaralatyndar qatarynda qoǵamdyq keńesterdiń qyzmeti týraly jáne depýtattar ázirlegen kúzet qyzmeti máseleleri zań jobalary, sondai-aq, adamdardy Qazaqstan sheginen tys jerge shyǵaryp jiberýge jáne biýdjet zańnamasyn jetildirýge qatysty zań jobalary bar.
Sonymen birge aldaǵy jalpy otyrysta Palata diplomatiialyq qyzmet týraly zań jobasyn jumysqa almaq.
