QR Tuńǵysh Prezidenti Nursultan Nazarbaev Májilis pen máslihat depýtattary arasynda jastar kóbirek bolýy kerektigin málim etti, dep habarlaidy QazAqparat.
«Partiia óziniń jas býynyna qashan da zor kóńil bólip keledi. Tórt jyl buryn 2020 jylǵa deiingi «Jastar Otanǵa» degen baǵdarlamany qabyldaǵan bolatynbyz. Biylǵy jyl – Jastar jyly dep jariialandy. Alaida, qoldaý sharalary jetkilikti dárejede kútken nátijeni bergen joq. Sheshilmegen suraqtar kóbeiip ketti. Jemqorlyq, baspana máselesi, jumysqa turý – partiia bul máselelerdiń barlyǵyn nazaryna alýy tiis. «Bes áleýmettik bastama» aiasynda jataqhanalardaǵy oryndardyń jetispeýshiligi máselesin sheshý kózdelgen edi. Asqar Uzaqbaiuly (Úkimet basshysy Asqar Mamin) bul jumystyń júrgizilip jatqanyn baian etti. Biraq, jumysty áli de kúsheitý kerek. Jataqhanalardaǵy oryn jetispeýshiligin sheshý qajet«, - dedi Elbasy «Nur Otan» partiiasy Saiasi keńesiniń keńeitilgen otyrysynda.
Nursultan Nazarbaevtyń sózinen keiin ornynan kóterilgen Premer-Ministr jataqhana qurylysy boiynsha jumys jospardan artyq oryndalyp jatqanyn aityp ótti.
Odan ári Elbasy jataqhana qurylysyn sýbsidiialaý baǵdarlamasyna toqtaldy.
«Burynǵy Úkimet jataqhana qurylysyn sýbsidiialaý baǵdarlamasyn bastaǵan bolatyn. Degenmen, is júzinde ol jumys júrmei qaldy. Jeke sektor úshin bul tartymsyz bolyp qaldy. Nelikten? Anyqtaý kerek. Jastardy sondai-aq, jumyspen jáne oqýmen qamtyp, áleýmettik liftterdi qalyptastyrý qajet. Biz qala men aýylǵa arnap, bul máselelerdiń sheshimin qabyldaǵanbyz. «Aýylǵa barsańdar, arnaiy mamandyq beremiz» dedik. Jumyspen qamtitynymyzdy aittyq. Aýylda jumys istegisi kelgender úshin mikronesieler bar. Jumysy joqtar mikronesie al da, eki siyr satyp alyp, ózińdi asyra! Artyq sútti satyp, aqsha tap! Tamaǵyńa tap ta, qalǵanyn bazarǵa aparyp sat. Bilimińmen iste. Biz istep jatqan sharýa álemniń eshbir jerinde joq», - dedi Elbasy.
Tuńǵysh Prezidenttiń aitýynsha, jastardy tiimdi túrde jumyspen qamtý júiesinde kemshilik bar.
«Bizde nashar jumys, jalqaýlyq bar. Májilis pen máslihat depýtattary arasynda jastar kóbirek bolýy tiis. «Jas Otan» – jastardy biriktirýshi ortalyqqa ainalýy qajet», - dedi ol.
