Májilis depýtattary «Ósimdikter dúniesi týraly» Qazaqstan Respýblikasy zań jobasyn birinshi oqylymda maquldady, dep habarlaidy QazAqparat.
Jańa zań jobasyn QR Ekologiia, geologiia jáne tabiǵi resýrstar ministri Serikqali Brekeshev tanystyrdy.
«Qurmetti depýtattar! Zań jobasyn qabyldaýdaǵy maqsat – respýblikanyń búkil aýmaǵynda ósimdikter dúniesin qorǵaý, molaitý jáne utymdy paidalaný salasyndaǵy qatynastardy quqyqtyq retteý. Qazirgi ýaqytta ósimdikter dúniesin paidalanýdy retteýge bailanysty jekelegen normalar QR Orman, Ekologiia, Jer, Sý, Kásipkerlik kodeksterin, «Qazaqstan Respýblikasyndaǵy sáýlet, qala qurylysy jáne qurylys qyzmeti týraly» jáne «Erekshe qorǵalatyn tabiǵi aýmaqtar týraly» QR Zańdaryn qamtidy. Osyǵan bailanysty «Ósimdikter dúniesi týraly» arnaiy zańdy qabyldaý qajettigi bar, ol Qazaqstan ratifikatsiialaǵan halyqaralyq konventsiialardyń erejelerine de negizdelgen», - dedi Serikqali Brekeshev Májilistiń jalpy otyrysynda.
Onyń aitýynsha, zań jobasyn ázirleý kezinde halyqaralyq tájiribe eskerildi.
Ósimdikter dúniesi týraly uqsas zańdar Aýstraliiada, Kanadada, Ońtústik Koreiada jáne Eýropalyq Odaq elderinde, Qazaqstan qabyldaǵan halyqaralyq konventsiialardyń, al jaqyn shet elderde – Armeniia, Belarýs, Qyrǵyzstan, Túrikmenstan, Ózbekstan jáne Ýkrainada bar.
Zań jobasyn retteý salasy tabiǵi jaǵdailarda ósetin ósimdikter dúniesi obektilerin, sondai-aq genetikalyq qordy saqtaý maqsatynda arnaiy jaǵdailarda ustalatyn jabaiy ósimdikter men olardyń bólikterin qamtidy.
«Ósimdikter dúniesi týraly» zań jobasynyń erejeleri aýyl sharýashylyǵy ósimdikterine, sondai-aq úi mańyndaǵy, saiajai jáne baý-baqsha ýchaskelerindegi ósimdikter dúniesi obektilerine qoldanylmaidy.
«Zań jobasynda ósimdikter dúniesi obektilerin túgendeý, memlekettik monitoring jáne kadastr tártibi aiqyndalady. Bul respýblikanyń búkil aýmaǵynda ósimdik resýrstarynyń esebin júrgizýge, olardyń sandyq jáne sapalyq sipattamalarynyń ózgeristerine taldaý jasaýǵa, sondai-aq ósimdikter dúniesi obektilerin ekonomikalyq baǵalaýǵa múmkindik beredi. Ǵylymi uiymdar bergen usynystar negizinde aýdandastyrylǵan aǵash túrleri, butalar, sondai-aq shópti ósimdikter arqyly jasyl jelekterdi qurý tártibi belgilenedi», - dedi ministr.
Sonymen birge, zań jobasynda ósimdikter dúniesi obektilerin introdýktsiialaýǵa jáne býdandastyrýǵa qoiylatyn talaptar, tabiǵi ósimdikter qoǵamdastyǵyna qater tóndiretin ósimdikterdiń bóten tekti túrlerin engizýge tyiym salý belgilenedi.
Memlekettik organdar men qoǵamdyq uiymdar júrgizetin memlekettik jáne qoǵamdyq baqylaý institýttary engizilýde.
«Zań jobasynyń negizgi jańalyǵy – ósimdik áleminiń jekelegen túrleriniń ainalysy salasynda habarlama jasaý tártibin belgileý. Bul otandyq kásipkerlik sýbektileriniń farmatsevtikalyq, azyq-túlik jáne tehnikalyq ónimderdi óndirý úshin ósimdik resýrstaryn zańdy negizde utymdy paidalaný múmkindigine ie bolatynyn bildiredi. Bul shara shaǵyn jáne orta biznesti damytýǵa, osy salaǵa investitsiialar tartýǵa, sondai-aq biznes sýbektileriniń ósimdikter dúniesin arnaiy paidalanǵany úshin tólemaqy engizýi arqyly memlekettik biýdjet kiristerin ulǵaitýǵa múmkindik beredi. Sonymen birge jeke tulǵalar jabaiy jemisterdi, jańǵaqtardy, sańyraýqulaqtardy, jidekterdi, dárilik shikizatty jáne ózge de ósimdik resýrstaryn jeke jáne úide paidalaný úshin óteýsiz negizde jáne ruqsat berý qujatynsyz jinaidy», - dedi Ekologiia ministri.
Jalpy alǵanda zań jobasy ósimdikter dúniesi salasyndaǵy jalpy memlekettik mindetterdi sheshýdi kózdeidi jáne «Ósimdikter dúniesi týraly» zańnyń normalaryn tolyq iske asyrý úshin Orman, Jer, Kásipkerlik, Salyq kodeksterine, «Ruqsattar jáne habarlamalar týraly», «Erekshe qorǵalatyn tabiǵi aýmaqtar týraly» jáne «Jaiylymdar týraly» zańdarǵa túzetý engizý talap etiledi.
