Parlament Májilisiniń jalpy otyrysynda «2011 jylǵy 22 maýsymdaǵy Keden odaǵyna múshe memleketterdiń keden qyzmetteriniń Birikken alqasy týraly shartqa ózgerister engizý týraly hattamany ratifikatsiialaý týraly» zań jobasy maquldandy, dep habarlaidy QazAqparat.
Keden qyzmetteri Birikken alqasynyń negizgi mindetteri: keden qyzmetteriniń ózara is-qimyldaryn úilestirý, óz quzyreti sheginde keden zańnamasynyń birkelki qoldanylýyn qamtamasyz etý, keden isi máseleleri boiynsha biryńǵai quqyqtyq bazany qalyptastyrýǵa qatysý.
«Ózderińizge belgili, 2015 jylǵy 1 qańtardan bastap EAEO-ny qurý týraly shart kúshine endi. 2017 jyly odaqtyń jańa Keden kodeksi qabyldandy. Osy ózgerister keden qyzmetteriniń birikken alqasynyń shartyna túzetýler engizýge negiz bolyp otyr. Hattamaǵa 2019 jyly tamyzda úkimet basshylary qol qoidy», - dedi Qarjy ministri Erulan Jamaýbaev.
Hattamada kelesi máseleler kózdelgen:
Birinshiden, múshe memleketterdiń Ortalyq keden organdary anyqtaldy. Qazaqstanda - bul Qarjy ministrliginiń Memlekettik kirister komiteti.
Ekinshiden, Birikken alqanyń birqatar fýnktsiialary Eýraziialyq ekonomikalyq komissiiaǵa berilýine bailanysty alynyp tastaldy.
Úshinshiden, kedendik ákelý bajdaryn esepke alý jáne bólý jónindegi kelisilgen qaǵidalardyń qoldanylýyn qamtamasyz etý bóliginde Birikken alqanyń quqyqtary alynyp tastaldy.
Tórtinshiden, sharttyń erejeleri Odaq týraly shart pen Odaqtyń Keden kodeksiniń terminologiiasyna sáikes keltirildi.
«Atap aitsaq, «Keden odaǵy» degen sóz «Eýraziialyq ekonomikalyq odaq» dep, «keden qyzmetteri» degen sóz «keden organdary» dep ózgertildi. Hattamany ratifikatsiialaý bizdiń elimiz úshin áleýmettik-ekonomikalyq jáne quqyqtyq saldarǵa ákep soqtyrmaidy jáne memlekettik biýdjetten qarajat bólýdi talap etpeidi», - dedi ministr.
