Parlament Májilisiniń jalpy otyrysynda «Memlekettik feldegerlik bailanys týraly» zań jobasy ekinshi oqylymda maquldandy, dep habarlaidy "Ult aqparat".
Zańynyń jobasyn Úkimet Qazaqstan Respýblikasy Parlamentiniń Májilisine 2020 jylǵy 6 qańtarda engizdi. Qujat feldegerlik bailanys salasyndaǵy zańnamany odan ári jetildirý maqsatynda ázirlendi.
Biyl 19 mamyrda atalǵan zań jobasy birinshi oqylymda maquldandy.
Feldegerlik qyzmetti uiymdastyratyn quzyrly organ – Premer-Ministrdiń keńsesi.
Bul qyzmettiń mindeti – Úkimettiń hat almasý jumysyn qamtamasyz etý, memlekettik organdardyń asa mańyzdy ári qupiia hattaryn tasý, arnaiy poshtalardy TMD-ǵa múshe elderge jetkizý.
«Zań jobasynyń negizgi erejelerine toqtalsaq, feldegerlik bailanystyń mindetteri men qaǵidattaryn zańnamalyq bekitýge, memlekettik feldegerlik qyzmet (MFQ) qyzmetkerleriniń quqyqtary men mindetterin aiqyndaýǵa, MFQ qyzmetkerleriniń quqyqtyq jaǵdaiyn reglamentteýge, MFQ qyzmetkerleriniń áleýmettik kepildikterin belgileýge baǵyttaldy», - dedi depýtat Berik Dúisenbinov.
Zań jobasyn qabyldaý qyzmettiń quqyqtyq, uiymdyq negizderin jáne MFQ qyzmetkerleriniń memlekettik organdarmen jedel ózara is-qimyl jasaý tártibin aiqyndaidy.
Zań jobasymen jumys barysynda depýtattar zań jobasyn «Quqyqtyq aktiler týraly», «Tótenshe jaǵdai týraly», «Ishki ister organdary týraly», «Saýda maqsatynda teńizde júzý týraly» zańdarǵa sáikes keltirýge baǵyttalǵan túzetýler engizdi.
Sonymen qatar, búgin Májilistiń jalpy otyrysynda «Qazaqstan Respýblikasynyń keibir zańnamalyq aktilerine memlekettik feldegerlik bailanys jáne ishki ister organdary qyzmetiniń máseleleri boiynsha ózgerister men tolyqtyrýlar engizý týraly» ilespe zań jobasy da ekinshi oqylymda maquldandy.
