Parlament Májilisiniń depýtattary Ekologiialyq kodeks jobasyn birinshi oqylymda maquldady, dep habarlaidy QazAqparat.
«QR keibir zańnamalyq aktilerine ekologiia máseleleri boiynsha ózgerister men tolyqtyrýlar engizý týraly zań jobasy jańa Ekologiialyq kodeks jobasynyń normalaryn iske asyrý maqsatynda ázirlendi. Zań jobasynda 9 kodeks pen 9 zańǵa ózgerister men tolyqtyrýlar engizý kózdelgen. Alaida zań jobasyn qaraý barysynda Ákimshilik quqyq buzýshylyq týraly kodekske jáne salyq zańnamasyna ózgerister men tolyqtyrýlar engizýdi shekteý jáne ońtailandyrý bóligi qaraldy. Osylaisha qoldanystaǵy zańnamanyń talaptaryn saqtaý maqsatynda zań jobasynan Ákimshilik kodekske, Salyq kodeksine engizýge usynylǵan túzetýler alynyp tastaldy», - dedi zań jobasy týraly depýtat Mansurhan Mahambetov.
Onyń aitýynsha, zań jobasynda Ekologiialyq kodeks jobasymen usynylyp otyrǵan tabiǵat paidalanýshylardy eń úzdik qoljetimdi tehnologiialardy paidalanýǵa yntalandyrý, ekologiialyq quqyq buzýshylyqtar úshin jaýaptylyqty arttyrý josparlanǵan. Sondai-aq «jasyl» tarifterdi engizý arqyly qaldyqtardy qaita óńdeý segmentin damytýdy yntalandyrý, ekologiialyq retteý men baqylaýdaǵy jańa tásilder siiaqty jańalyqtardy iske asyrý úshin quqyqtyq negizder qurý maqsatynda qoldanystaǵy zańnamaǵa ózgerister engizý kózdelip otyr.
«Jumys toby sheńberinde kelip túsken usynystar men túzetýler qaraldy. Olar mindetti ekologiialyq saqtandyrýǵa bailanysty máselelerdi retteýdi, ruqsat qujattaryn alý bóliginde Orman jáne Sý kodeksterine ózgerister engizýdi, meditsinalyq qaldyqtarmen jumys isteý jónindegi qyzmetti retteýdi qorshaǵan ortany qorǵaý salasyndaǵy ýákiletti organnyń qaramaǵyna berýdi kózdeidi. 300-den astam usynys qaralyp, talqylandy, olardyń kópshiligi boiynsha sheshim qabyldandy. Al bir bóligi Úkimetke qorytyndy alýǵa jiberildi. Tutastai alǵanda zań jobasy boiynsha jumys tobynyń 4 otyrysy, komitettiń keńeitilgen otyrysy, sondai-aq ártúrli alańdarda komitettiń 2 kóshpeli jáne 2 keńeitilgen otyrysy ótkizildi. Barlyq komitet zań jobasy boiynsha oń qorytyndylaryn berdi», - dedi ol.
