Depýtattardyń aimaqtarǵa sapary jalǵasýda. Májilismen Rýslan Qojasbaev «AMANAT» partiiasy Jetisý oblysy boiynsha filialynyń qoǵamdyq qabyldaý bólmesinde azamattardy qabyldady.
Qabyldaý barysynda oblys turǵyndary depýtatqa áleýmettik qamsyzdandyrý, bilim berý, kommýnaldyq sharýashylyq, jol qurylysy jáne basqa da máselelerdi kóterdi.
Taldyqorǵan qalasynyń kásipkeri Erlik Beibituly eki jyldan astam aǵash óńdeý kásibimen ainalysyp keledi. Endi ony keńeitip, jańa qural-jabdyqtar alýdy josparlap otyr. Kásipkerlerdi qoldaýdyń memlekettik baǵdarlamasy boiynsha 5 million teńge óteýsiz grant alý úshin biznes-jospar daiyndaǵan. Biraq komissiia quramynda tiisti mamandar bolmaǵandyqtan ony qorǵai almaǵan.
"Granttardy bólý erejeleri ýaqyt talabyna sai bolýǵa tiis. Bul máseleni Ulttyq ekonomika ministrligimen birlesip zerdeleý qajet. Sonda múmkindiginshe shaǵyn biznes tegin granttardy paidalana alady", – dedi Rýslan Qojasbaev.
Bul rette depýtat biznesti qoldaý boiynsha basqa da birqatar memlekettik baǵdarlama bar ekenin eske saldy. Máselen, «DAMÝ» qory arqyly, «Biznestiń jol kartasy», «Ulttyq kásipkerlikti damytý jobasy» jáne basqalar.
Áleýmettik qorǵaý máselesi de kóterildi. Taldyqorǵan qalasyndaǵy «Asar» dene shynyqtyrý-saýyqtyrý ortalyǵynyń basshysy Eldos Baialyshbaev kóppáterli turǵyn úilerdi erekshe qajettilikteri bar adamdar úshin beiimdeýdiń, atap aitqanda, kireberis esik, balkon, as úige arnalǵan arnaiy qurylǵylarmen jabdyqtaýdyń mańyzdylyǵyna nazar aýdardy.
Bul rette Rýslan Qojasbaev qoljetimdi ortany qurý boiynsha «Kedergisiz keleshek» partiialyq jobasyna toqtaldy. Qazirgi tańda ákimdik Jetisý óńirinde 2021-2023 jyldar aralyǵynda beiimdeý josparlanǵan 410 áleýmettik nysannyń 382-sinde beiimdeý sharalaryn júrgizdi.
"Qoljetimdilik standarttary ázirlenbei turyp salynǵan úiler baryn, lift nemese pandýs ornatý múmkin emes jerler de bar ekenin umytpaǵan jón. Endi bizdiń mindetimiz – árbir qurylys kompaniiasy barlyq tehnikalyq standartqa sai bolýy úshin ázirleýshilerdi qadaǵalaý. Barlyq naqty faktini jergilikti atqarýshy organdarǵa joldaimyn, anyqtalǵan buzýshylyqtar jaqyn arada joiylýǵa tiis", – dedi depýtat.
Jetisý óńirindegi «AMANAT» partiiasynyń qoǵamdyq qabyldaý bólmelerine barlyǵy 2024 jyldyń basynan beri 1500-ge jýyq aryz-shaǵym tirkelip, olardyń basym bóligi oń sheshimin tapqan.
