QR Parlament Májilisiniń depýtaty Syrym Ertaev Túrkistan oblysy, Tólebi aýdanyna jumys saparymen kelip, Kóksáiek aýyldyq okrýgi ákimdigine úmitker Jeksenbek Sarsáýletovpen birge «Jomart» sharýa qojalyǵynyń jaǵdaiymen tanysty, dep habarlaidy "Ult aqparat".
Kóksáiek aýyldyq okrýgi, Qazaqstan eldi mekenindegi «Jomart» sharýa qojalyǵy 2002 jyly qurylǵan. Qojalyq mal ósirýmen jáne bordaqylaýmen ainalysady. Búgingi tańda munda 50 jylqy, 100 iri qara, 2000 qoi bar. Sharýa qojalyǵynyń iesi Nurbol Amanjolovtyń aitýynsha, jylyna 120-130 tonna et óndiredi. Negizinen qoi eti saýda oryndaryna shaǵarylady. Munda 6 adam turaqty jumys isteidi. Maýsymdyq jumys kezinde qosymsha 25 adam jumyspen qamtylady. Aldaǵy ýaqytta qojalyq tórt túlik sanyn arttyryp, asyl tuqymdy mal sharýashylyǵyn damytýdy kózdep otyr.
Kásipker N.Amanjolov qojalyqtyń búgingi jai-kúii, atqarylǵan jumystar jaiynda qysqasha áńgimelep, sharýalardy tolǵandyryp otyrǵan máselelerin habarlady. Kezdesýge kelgen aýyl turǵyndary aýyl sharýashylyǵyna qatysty suraqtaryn qoiyp, halyq qalaýlysy men ákimdikke úmitker azamattyń pikirlerin tyńdady.
Depýtat Syrym Ertaev aýyl sharýashylyǵyn damytýǵa baǵyttalǵan memlekettik baǵdarlamalar jáne onyń tiimdiligi, sharýalarǵa beriletin kómekter jóninde áńgimeledi. 7 shildeden beri Túrkistan oblysynyń barlyq derlik aýdan-qalalaryn, eldi mekenderin aralap júrgen ol respýblikalyq deńgeide sheshiletin máseleler boiynsha depýtattyq saýal, hat daiyndalyp, naqty jumys júretinin aitty.
El azamattarymen kezdesken jergilikti turǵyndar aýyldyń eńsesin kóterý jolyndaǵy jumystar jandana tússe degen tilekterin jetkizdi.
