Májilistiń jalpy otyrysynda depýtat Fahriddin Qarataev el óńirlerinde sapasyz salynǵan úilerdi tekserýdi surady, dep habarlaidy QazAqparat.
«Bizdiń depýtattyq saýalymyzǵa óńirlerdegi is-sapar barysynda turǵyndar memleket tarapynan halyqqa berilgen turǵyn úiler qurylysynyń sapasy nasharlyǵyn jetkizip, ásirese, memlekettik baǵdarlamalar boiynsha paidalanýǵa tapsyrylǵan úilerdiń sapasy syn kótermeýine bailanysty halyq narazylyǵyn bildirýde. Barshamyzǵa belgili, jaqynda Úkimettiń keńeitilgen otyrysynda elimizdiń Prezidenti salynyp jatqan jańa úilerdiń sany men sapasyn tekserýdi tapsyrǵan bolatyn. Atap aitsaq, ondaǵan jyldar boiy kezek kútip, baspanaǵa áreń qol jetkizgen turǵyndardyń ókpesi qara qazandai. Óitkeni úileriniń shatyrynan sý sorǵalap, kirpishi qulaǵan, qabyrǵasy jarylyp, kóterilip, edeni opyrylǵan, syrty túse bastaǵan», - dedi F. Qarataev Úkimet basshysy Álihan Smaiylovtyń atyna joldaǵan saýalynda.
Onyń aitýynsha, sapasyz úilerdiń basym bóligi «Nurly jer» jáne basqa da memlekettik baǵdarlamalar aiasynda salynǵan jáne ipoteka arqyly áleýmettik osal toptaǵy azamattarǵa berilgen.
«Ókinishke qarai, atalǵan turǵyn úi keshenderinde qanshama halyq janyn shúberekke túiip amalsyz ómir súrýde. Erteń osy úiler qulasa buǵan kim jaýapty bolmaq? Bul degenińiz óte ózekti jáne kezek kúttirmes úlken másele. Joǵarydaǵy máseleniń ózektiligin eskerip, respýblikalyq komissiia qurýdy, onyń quramyna qoǵam belsendilerin jáne turǵyn úi alýshylardy engizýdi usynamyz. Sonymen qatar, barlyq oblystardaǵy, qaladaǵy problemalyq turǵyn úilerdi qaita tekserýden ótkizip, úilerde turý qaýipsizdigin, avariialyq deńgeiin anyqtaý kerek. Respýblika boiynsha turǵyn úilerdi qabyldaityn tiisti jergilikti atqarýshy organdardy tekserip, kinálilerdi jaýapqa tartýdy, depýtattyq saýalǵa zańnamaǵa sáikes jazbasha jaýap berýińizdi suraimyz», - dedi depýtat.
