Muǵalimderdiń eńbekaqysy eldegi ortasha jalaqy mólsherinen tómen bolmaýy kerek. Májilistiń jalpy otyrysynda depýtattar ustazdardyń jalaqysyna qatysty másele kóterdi, dep habarlaidy Sputnik Qazaqstan tilshisi.
Májilis depýtaty Irina Smirnova depýtattyq saýalynda muǵalimderge jalaqysyn ulǵaitýǵa múmkindik beretin kezekten tys attestatsiia ótkizý júiesin synǵa aldy.
Onyń aitýynsha, máselen, 2018 jyly kezekten tys attestatsiiany túlekter emtihan tapsyratyn kúnderi, iaǵni qarbalas sátte ótkizgen. Biyl da dál osyndai jaǵdai qaitalanǵaly otyr.
"Attestatsiiany qolaisyz ýaqytta ótkizý birden barlyq muǵalimniń jalaqysyn kótermeý úshin jasalyp otyrǵan siiaqty seziledi", - dedi depýtat.
Smirnova attestatsiia kezinde sol baiaǵy aýyl muǵalimine salmaq túsetinin aitty.
"Testileý pýnktine tańǵy saǵat segizde kelýi kerek bolǵan. Iaǵni, ol muǵalim túnde nemese odan erterek aýyldan shyǵýy kerek degen sóz. Onsyz da jalaqysy az muǵalim jolǵa shyǵyndalady. UBT tapsyratyn túlekter siiaqty olar da metall izdegish ramka men komissiianyń tekserisinen ótken", - dep ashyndy depýtat.
Bilim jáne ǵylym ministrligi attestatsiiaǵa qatysý ár pedagogtyń óz qalaýy ekenin málimdese de, joǵary jalaqydan úmitti kez kelgen muǵalim oǵan qatysýy tiis.
"Qosymsha aqyny emtihandy tapsyryp qana alýǵa bolady", - deidi Smirnova.
Sondai-aq, depýtattyń aitýynsha, attestatsiiadan ótkisi keletin muǵalimder ótinish pen qujattan bólek, oqýshylar, olardyń ata-analary men áriptesteri arasynda júrgizilgen saýalnama nátijesi men pikirlerin usynýy tiis. Ár muǵalimniń ótinishin sarapshylar komissiiasy qarap, bekitedi. Buǵan qosa, kez kelgen ustaz komissiiaǵa óziniń jetistikteri jinalǵan portfolio usynýy kerek.
"Munyń bári qosymsha aqy máselesin sheshý úshin jasalatyn dúnieler. Biraq, qalai bolǵanda da, muǵalim tym quryǵanda eldegi ortasha jalaqyny da ala almaidy. Mektepke endi kelgen jas muǵalimniń laiyqty jalaqy alýy tipten múmkin emes. Attestatsiiany ótkizgennen keiin de bilim salasyndaǵy jalaqy eldegi eń tómengi eńbekaqynyń qatarynda qalyp otyr", - dedi halyq qalaýlysy.
Osy oraida Smirnova bilim jáne ǵylym ministrligine muǵalimderdiń eńbekaqysy men olardyń jumysyn baǵalaý ádisterin ózgertýdi usyndy.
"Tipti jumysqa endi kirisken pedagogtyń, tárbieshi men oqytýshynyń eńbekaqysy eldegi ortasha jalaqydan tómen bolmaýy tiis. Máselen, Singapýr men Estoniia elderi osy joldy ustanǵan. Finliandiia, Ońtústik Koreia, Qytai jáne basqa da elder de budan da joǵary", - dedi ol.
