Parlament Májilisiniń jalpy otyrysynda depýtat Edil Jańbyrshin Atyraý, Aqtóbe, Qyzylorda, Mańǵystaý jáne Túrkistan oblystarynyń aýyl sharýashylyǵy salasyna qiyndyq týǵyzyp otyrǵan máselelerdi kóterdi, dep habarlaidy "Ult aqparat".
«Ásirese, Mańǵystaý men Qyzylorda oblystarynda ata-babamyzdan qalǵan asyl muranyń biri – tórt túlik maldy ustap otyrǵan sharýashylyqtar men turǵyndar asa aýyr jaǵdaida. Elde oryn alǵan sý tapshylyǵy men qýańshylyq jailymdyq jerlerdiń jaǵdaiyn ketirdi. Osy jaǵdai tiisinshe maldyń shyǵynyna ákeldi. 2020 jyly Mańǵystaý oblysynda 4883 mal basynyń ólimi tirkelse, biyl birinshi toqsan qorytyndysy boiynsha 1332 bas mal ólgen. Bul málimet tek syrǵalanǵan, tirkelgen mal shyǵyny boiynsha ǵana, al, oblystaǵy maldyń 56% quraityn qalyń buqaranyń qansha maly qyrylǵany belgisiz», - dedi E. Jańbyrshin Úkimet basshysynyń orynbasary Roman Skliardyń atyna joldaǵan depýtattyq saýalynda.
Sonymen qatar ol mundai jaǵdai Qyzylorda oblysynda da tirkelgenin, 481 bas mal qyrylǵanyn aitty. Osyndai jaǵdai mal azyǵynyń baǵasyn eselep kóterip jiberdi. Baǵany kóterip otyrǵan jol shyǵyndary jáne osydan paida kórip qalaiyn dep otyrǵan deldaldar.
«Osy zaýaldyń kesirinen qanshama otbasy aýyr jaǵdaiǵa ushyrady, qanshama sharýashylyq jer sipap qaldy?! Onyń esebi bar ma? Osyndai jutta halyqqa qalai kómek beremiz?! Árine, halyq birinshi kezekte Parlamentke, Úkimetke úmit artady. Qazirgi tańda Aýyl sharýashylyq ministrligi jáne jergilikti atqarýshy bilik jem-shóp jetkizý, qarjy bólý siiaqty sharalardy iske asyryp jatyr. Alaida, bul kómek barlyq mal sharýashylyǵy men jeke adamdardyń mal basyn qamtymaidy, sondai-aq jetkizilip otyrǵan azyqtyń baǵasy qoljetimdi bolmai tur. Jalpy, bolyp jatqan jaǵdai, ár óńirdiń erekshelikterin eskergen, ǵylymi zertteýlerge negizdelgen elimizdiń mal sharýashylyǵyn damytýǵa arnalǵan júieli-josparly jumystyń joqqa jaqyn ekenin aiqyn kórsetip otyr. 21 ǵasyrda kosmosty igerip, Avstraliia men Kanadadan asyl tuqymdy mal aldyryp, dúnieniń bárin tsifrlandyryp jatqanda, malǵa azyq taýyp bere almai jatqanymyz óte uiat!», - dedi depýtat.
Osyǵan orai azamattarǵa kómek kórsetý maqsatynda jáne mal basyn aman alyp qalý úshin tiisti usynystar jasaldy:
1. Qalyptasqan jaǵdailarǵa bailanysty jut jailaǵan naqty aýdandar men aimaqtarda shuǵyl túrde jergilikti dárejedegi tótenshe jaǵdai jariialanyp, olarǵa tiisti biýdjettik kózderden jáne materialdyq qorlardan naqty kómekter kórsetilýi tiis;
2. Zardap shegip jatqan aýdandarǵa mal azyǵyn jetkizý úshin kórshi oblystardan tasymaldanatyn mal azyǵynyń jol shyǵyndaryn sýbsidiialap, tiisti ákimshilik-basqarý sharalaryn iske asyrý qajet;
3. Qýańshylyqtan qiyndyq kórip otyrǵan óńirlerge basqa oblystardan tez arada mal jaiýǵa jáne mal azyǵyn daiyndaýǵa jer telimderi ýaqytsha paidalanýǵa berý;
4. Mundai jaǵdai aldaǵy ýaqytta oryn alý yqtimaldyǵyn eskerip, mal sharýashylyǵymen ainalysatyn tulǵalarǵa jedel kómek kórsetý, saqtandyrý, aimaq aralyq qatynastardy júieleýdiń naqty, keshendi mehanizmderi men algoritmderin jasaqtaýy tiis.
