QR Parlamenti Májilisiniń depýtaty Meirambek Tólepbergen «Kóne Taraz» mýzeiiniń jeti jylǵa jýyq ýaqyt boiy jumys istemei turǵanyn aityp, Premer-Ministrdiń orynbasary Eraly Toǵjanovtyń atyna saýal joldady, dep habarlaidy QazAqparat.
«2015 jyly elimizde memlekettigimizdiń bastaýy - Qazaq handyǵynyń 550 jyldyǵyn atap óttik. Respýblikalyq deńgeide qolǵa alynǵan merekelik is-sharanyń sharyqtaý shegi Taraz qalasynda boldy.
Osy saltanattyń aiasynda kóne qalanyń qaq ortasynda «Kóne Taraz mýzeiiniń» ashylýy bizdiń mádeni-rýhani ómirimizde eleýli oqiǵa bolǵany anyq.
Alaida, ataýly jańalyqtyń jalǵasýy, ulttyq mádeni máni men onyń halyqaralyq deńgeide týristerdi qyzyqtyratyn jolyn ashpai, múldem toqtap qaldy.
Sebebi, ataq-dańqy alysqa ketip, syrttai ásemdigi kóz tartatyn sý jańa mýzei ǵimaraty sapasyz salynǵan bolyp shyqty.
Tóbesinen sý sorǵalady, jertóle úi-jaiy jaramsyz, káriz júiesi, elektrmen jabdyqtaý, jeldetý jáne jylytý, salqyndatý júieleri múldem jumys istemeidi», - dedi depýtat.
Depýtattyń málimeti boiynsha, bul qurylysty salýǵa jáne sol ýaqytta mýzeilendirýge 1 mlrd. 200 mln. teńgege jýyq qarjy jumsalǵan.
«Osynshama memleket qarjysy aýaǵa ushqanmen birdei bolady. Jergilikti atqarý organdary bas merdigerdiń jumysty sapasyz oryndaǵany úshin kelisim-shartty buzýy, odan keiin qaita jóndeý jumystaryna júginýi eshqandai nátije bergen joq.
Jeti jylǵa jýyq jumys istemei, kózge kúiik bolyp, qańqiyp turǵan bul mýzeidiń taǵdyry qalai bolǵanda da sheshilýi tiis», - degen Májilis ókili «AMANAT» partiiasy fraktsiiasynyń atynanbirneshe naqty usynys aitty.
Olar:
1) Osy «saqaldy qurylysty» aiaqtaýdyń amalyn qarastyrý;
2) Sheshim qabyldaǵan sheneýnikterdiń jaýapkershilik deńgeiin anyqtaý;
3) Mundai soraqylyqtyń qaitalanbaýy úshin quqyqtyq jaǵdai jasaý.
