QR Parlamenti Májilisiniń depýtaty Baqytbek Smaǵul Almaty oblysyndaǵy shekara zastavalaryna bardy. Halyq qalaýlysy shekarashylardyń tynys-tirshiligimen tanysty, dep habarlaidy "Ult aqparat".
Májilistegi jazǵy demalysty tiimdi paidalanǵan depýtat eń aldymen Jalańashkól zastavasyna bardy. Eldiń shetinde, jeldiń ótinde Otan aldyndaǵy boryshyn abyroimen atqaryp jatqan ofitserler jáne sarbazdardyń jaǵdaiyn baǵdarlap, jaraqtanýymen tanysty. Halyq qalaýlysy shekarashylardyń materialdyq-tehnikalyq bazasynyń qanaǵattanarlyqtai, al shekarashylardyń jaǵdaiy jaqsy ekendigin kórdi.
Biyl 18 tamyzda Qazaqstan Respýblikasy Ulttyq qaýipsizdik komiteti Shekara qyzmetiniń qurylǵanyna 27 jyl tolady. Sondai-aq Jalańashkól oqiǵasyna 50 jyl. Osy bir qos aitýly dataǵa orai jetisýlyq shekarashylar óz zastavalary arasynda atty sherý uiymdastyrdy. Tulpar minip, tý ustaǵan sarbazdar taý-taspen, orman-toǵai arasymen 200 shaqyrymǵa jýyq júrip ótti. «Bul sherý olardyń óz qyzmettesterine kórsetken qurmet jáne jarty ǵasyr buryn bolǵan Jalańashkól oqiǵasynda qaza tapqan sarbazdar rýhyna taǵzym etý», - deidi «Dostyq» shekara komendatýrasy basshysynyń orynbasary Samat Salaýatov.
Atty sherýdiń estafetasyn Jalańashkól zastavasynda Májilis depýtaty Baqytbek Smaǵul qabyldap, aq batasyn berip, Maqanshy shekara zastavasyna joldady. Sondai-aq halyq qalaýlysy Dostyq aýylyndaǵy Jońǵar shekara zastavasyna da baryp, sarbazdardyń jaǵdaiyn surastyrdy. Óz shyǵarmalarynan jalyndy óleńder oqyp, kúrdeli jóndeýden ótken zastava aýlasyna shyrsha otyrǵyzdy.
