Foto: ashyq derekkóz
Májilis depýtaty Amanjol Áltaev Almatynyń ataqty aport almasy men qyzǵaldaǵyn ulttyq maqtanysh, brend retinde resmi túrde tanýdy usyndy. Onyń pikirinshe, elimizdegi tuqym sharýashylyǵymen ainalysatyn fermerlerdi memlekettik qoldaý qajet. Bul týraly Ult.kz habarlaidy.
"Otandyq tuqym ósirýshilerdi qoldaýǵa erekshe nazar aýdarý kerek. Máselen, Qaraǵandy oblysynda ornalasqan «Astro-Agro» JShS birneshe jyldar boiy kartopty ǵylymi turǵydan zerttep kele jatqanyna qaramastan, memleket tarapynan qoldaý kórmei keledi," – dedi ol Májilistegi jiyn barysynda.
Depýtat shetel tájiribesin de mysalǵa keltirdi.
"Ósimdikterdiń jańa sorttaryn qorǵaý jónindegi halyqaralyq odaqqa múshe bolýǵa bailanysty byltyr Niderlandyda áriptesterimizben birge boldyq. Shynyn aitý kerek, bul salada bizden ozyp ketken. Osy odaqqa múshe bola otyryp, olardyń tájiribesin paidalanyp, otandyq tuqym sharýashylyǵyn damytýǵa jol ashýymyz qajet," – dep túsindirdi ol.
Áltaevtyń pikirinshe, Niderlandydaǵy tanymal qyzǵaldaqtyń otany – Qazaqstan, jáne bul gúldi ulttyq brend retinde tanytýǵa tolyq múmkindik bar.
"Qyzǵaldaqtan bólek, Almatynyń aport almasy da – ulttyq maqtanyshymyz. Ókinishke orai, qazir bala kezimizdegi aport almasynan aiyrylyp qaldyq," – dep oiyn jetkizdi depýtat.
Aita keteiik, shetel ǵalymdary barlyq almanyń túp atasy Almaty óńirinde paida bolǵanyn dáleldegen.
