Túrkistan oblysy, 9 qańtar. Májilistegi «AMANAT» partiiasy fraktsiiasynyń depýtattary Qairat Balabiev, Ulasbek Sádibekov, Temir Qyryqbaev pen Nursultan Baitilesov búgin Túrkistan oblysynda bolyp, Saryaǵash aýdanyndaǵy kásipkerlik nysandardy aralady. Sondai-aq, aýdan jurtshylyǵymen kezdesti.
Májilis depýtattary eń áýeli óńirdegi «Agrotur» sharýa qojalyǵy jylyjaiynyń tynys-tirshiligimen tanysty. Munda 4 gektar jerde qiiar men qyzanaqtan bastap kóptegen baqsha ónimderi ósiriledi. Olardyń qatarynda záitún men rozmarin, kivi men qulpynai, anar men qurma siiaqty sirek kezdesetin jemister bar. Sondai-aq bir gektar jerde qiiar men qyzanaq kósheti, al eki gektar baqta almurt, shie men órik egiledi. Sonymen birge qojalyq gollandiialyq gúlderdi ósirip, satylymǵa shyǵarady. Qazir tropikalyq jemisterdi ósirý jolǵa qoiylǵan.
Depýtattar jylyjai qyzmetkerlerimen áńgimelesip, aýyl sharýashylyǵy salasyn damytýǵa baǵyttalǵan zańdar týraly aityp berdi. Kásipkerler tuqymbaq sharýashylyqtaryn sýbsidiialaý, jylyjailardy kómirmen qamtamasyz etýde týyndaityn problemalarǵa qatysty oilaryn ortaǵa salyp, usynystaryn jetkizdi.
– Biz bul jylyjai keshenine arnaiy kelip otyrmyz. Óitkeni Parlamentte jylyjai sharýashylyqtaryn memlekettik sýbsidiialaý týraly másele kótergen edik. Ol oń sheshimin taýyp, jylyjailarǵa sýbsidiia berile bastady. Jylyjai – aýyl sharýashylyǵy salasynyń mańyzdy baǵyttarynyń biri. Sondyqtan aitylǵan usynystaryńyzdyń bári tiisti ministrlikterge jetkizilip, zerdelenetin bolady. Qajet bolsa, zańnamaǵa ózgeris engizý máselesin de qarastyramyz, – dedi Qairat Balabiev.
Odan ári depýtattar Saryaǵash qalasyndaǵy «Báiterek- Shymkent» tamaq ónerkásibi mekemesinde boldy. Kásiporyn sapaly konditerlik taǵamdarmen ishki naryqty qamtamasyz etip qana qoimai, kórshiles elderge de eksportqa shyǵarady. Depýtattar suranysy joǵary ónim túrlerin kóbeitý, ishki óndiris áleýetin arttyrý siiaqty birqatar suraq boiynsha pikir almasty.
Májilistiń Baspasóz qyzmeti («AMANAT» partiiasy Túrkistan oblystyq filialynyń baspasóz qyzmetiniń aqparaty boiynsha ázirlendi)
