Májilis tóraǵasynyń orynbasary Gúlmira Isimbaeva Búkilqytailyq halyq ókilderi jinalysy Turaqty komiteti tóraǵasynyń orynbasary Van Chenmen onlain-kezdesý ótkizdi, dep habarlaidy QazAqparat tómengi palatanyń baspasóz qyzmetine silteme jasap.
Taraptar áńgimelesý barysynda ekijaqty yntymaqtastyqtyń, halyqaralyq uiymdardaǵy ózara is-qimyldyń jáne óńirdegi qazirgi ahýaldyń keń aýqymdy máseleleri boiynsha pikir almasty. Sondai-aq 2022 jyly 30 jyldyǵy atap ótiletin ekijaqty qarym-qatynastardyń qarqyndy jáne údemeli damýy týraly aitty.
Májilis tóraǵasynyń orynbasary Nur-Sultan men Beijiń arasynda diplomatiialyq qarym-qatynas ornaǵan 28 jyl ishinde qarqyndy saiasi dialog pen tereń ekonomikalyq bailanystar ornap, jan-jaqty ózara is-qimyl serpindi damyp kele jatqanyna toqtaldy.
Gúlmira Isimbaeva áńgimelesý barysynda bul eki el keshbasshylarynyń eńbegi ekenin, Qazaqstan-Qytai qarym-qatynastarynyń qalyptasýy men nyǵaiýynda Qazaqstannyń Tuńǵysh Prezidenti, Elbasy Nursultan Nazarbaevtyń erekshe rólin atap ótti. Al Memleket basshysy Qasym-Jomart Toqaevtyń sapary jáne sol resmi sapar barysynda birlesken málimdemege qol qoiylýy Qazaqstan-Qytai qatynastarynyń jańa dáýiriniń bastalýy ekenine nazar aýdardy.
Óz kezeginde Qytai Parlamentiniń ókili Qazaqstanmen ekijaqty yntymaqtastyqty odan ári nyǵaitýǵa úlken qyzyǵýshylyq tanytyp, olardy «qazirgi zamanǵy halyqaralyq qatynastardaǵy dostyq pen tatý kórshiliktiń etalony» dep atady.
Ekonomikalyq ózara is-qimyl týraly áńgime barysynda taraptar QHR-nyń «Bir beldeý – bir jol» bastamasyna jáne Qazaqstan Respýblikasynyń Tuńǵysh Prezidenti Nursultan Nazarbaevtyń «Nurly jol» baǵdarlamasyna úlken kóńil bólinetinin málimdedi.
Budan basqa otyrysta koronavirýstyq infektsiia pandemiiasynyń teris saldaryn azaitý boiynsha tájiribe almasý úshin eki eldiń kúsh-jigerin úilestirýdiń mańyzdylyǵy atap ótildi.
Osyǵan bailanysty Qytai vitse-spikeri Qazaqstannyń eldegi epidemiialyq jaǵdaidyń shielenisýi kezeńinde kórsetken kómegi úshin alǵys aityp, COVID-19 indetine qarsy jańa ekpe ázirlep, ony synamadan ótkizgeni týraly habarlady.
Óz kezeginde Gúlmira Isimbaeva Qytai dárigerlerine konsýltativtik jáne tájiribelik kómek kórsetkeni úshin rizashylyǵyn bildirdi.
Sonymen qatar, taraptar ekonomikany tsifrlandyrý, jasandy intellekt, aýyl sharýashylyǵy, densaýlyq saqtaý, kólik jáne basqa da salalardaǵy yntymaqtastyqty odan ári keńeitý qajettigin atap ótti.
Áńgimelesý barysynda eki eldiń zań shyǵarýshy organdarynyń syndarly jáne serpindi dialog isindegi mańyzdy róli atap ótildi.
Kezdesýge Májilis depýtattary Muhtar Erman men Qýanysh Sultanov qatysty.
