Jambyl oblysy Kóksai shatqalynda qar kóshkininen qaza tapqan áskeri qyzmetshilerdiń jaqyndary men týystaryna májilismender kóńil aitty, dep habarlaidy QazAqparat.
«Qaza tapqan áskerilerdiń jaqyndary men týystaryna qaiǵyra kóńil aitamyz», - dedi Májilistiń Halyqaralyq ister, qorǵanys jáne qaýipsizdik komitetiniń tóraǵasy Máýlen Áshimbaev Jambyl oblysyndaǵy qar kóshkininen bolǵan qaiǵyly oqiǵa jóninde.
«Jambyl oblysynda úlken qaiǵyly oqiǵa oryn aldy - jeti áskeri qyzmetshi áskeri boryshyn óteý jolynda kóz jumdy. Óz atymnan, Halyqaralyq ister, qorǵanys jáne qaýipsizdik komitetiniń músheleri atynan jáne barlyq áriptesterim - Qazaqstan Parlamenti Májilisiniń depýtattary atynan qaza tapqan áskerilerdiń otbasyna, týystary men jaqyndaryna qaiǵyra kóńil aitamyn. Olar áskeri istiń kásibi mamandary jáne óz Otanynyń naǵyz patriottary boldy. Olardyń týystary jáne jaqyndarynyń qaiǵysyna ortaqpyz. Túsinemin, mundai orny tolmas qazaǵa kóndigý qiyn, biraq marqumdardyń otbasy barlyq qazaqstandyqtardyń qaiǵyryp otyrǵanyn bilýi tiis. Barlyǵymyz qaiǵyra kóńil aitamyz. Úkimet qaiǵyly oqiǵanyń mán-jaiyn anyqtaityn arnaiy komissiia qurdy. Qorǵanys ministrligi men quqyq qorǵaý organdary sebepterdi anyqtaý úshin barlyq qajetti sharalardy jasaýda jáne qaza tapqandardyń januiasyna kómek kórsetý jumystary uiymdastyryldy. Sonymen birge, Qarýly Kúshterde mundai qasirettiń qaitalanbaýy úshin barlyq qajetti sharany jasaý kerek», - dedi M.Áshimbaev.
