Májilistiń jalpy otyrysynda «Qazaqstan Halyq partiiasy» fraktsiiasynyń depýtattary quramynda genetikalyq túrlendirilgen organizmder (GMO) bar ónimderdi Qazaqstanda satýǵa jol bermeý máselesin kóterdi.
Osy oraida Úkimet basshysy Asqar Maminniń atyna depýtattyq saýal joldandy, dep habarlaidy "Ult aqparat".
«Qazirgi kezde EAEO-nyń barlyq elinde genetikalyq túrlendirilgen organizmderge (GMO) jáne olardan jasalǵan ónimderge qatysty jalpy saiasat qalyptastyryldy. Gendik injeneriia negizinde alynǵan aýyl sharýashylyǵy ósimdikteriniń tuqymdaryn satýǵa jáne egý úshin paidalanýǵa zań júzinde tyiym salynǵan. Quramynda GMO kóp kezdesetin importtyq ónimder túrli shekteýler men tyiymdardyń kómegimen odaq aýmaǵynan júieli túrde shyǵarylýda», - dedi depýtat Aiqyn Qońyrov.
Onyń aitýynsha, EAEO aýmaǵynda quramynda GMO bar aýylsharýashylyq ónimderin óndirý jaǵdailary tirkelip jatyr. Ol jartylai fabrikattar men tamaq ónimderin óndirýde qoldanylyp otyr.
Qytai Halyq Respýblikasynyń Bas keden basqarmasy 2020 jyldyń shildesinde Resei Federatsiiasynyń «Rosselhoznadzor» mekemesine Resei rapsynyń 23 partiiasynda, sondai-aq soia maiynyń 10 partiiasynda GMO komponentteriniń tabylǵany týraly habarlady. Joǵaryda aitylǵandardy eskere otyryp, «Qazaqstannyń Halyq partiiasy» fraktsiiasy Úkimettiń nazaryn Resei Federatsiiasy aýmaǵynda GMO tuqymdary men daiyn ónimderiniń ainalymyna qatysty baqylaýdyń jetkiliksizdigine aýdaryp otyr.
«Bizdiń oiymyzsha, saýda seriktesteri aldyndaǵy óz mindettemelerin oryndamaý aýyl sharýashylyǵy taýarlaryn óndirýshiler men halyq úshin tikelei qater tóndiredi. Osyǵan bailanysty Eýraziialyq ekonomikalyq komissiianyń alańynda GMO-ǵa qatysty problemany kóterýdi jáne GMO tuqymdarynyń enýin, qoldanylýyn jáne daiyn ónimdi EAEO aýmaǵynan Qazaqstanǵa ótkizýdi boldyrmaý úshin qosymsha Ulttyq qorǵaý tetikterin qurýdy usynamyz», - dedi Aiqyn Qońyrov.
