Májilis depýtattary «QR-da beibit jinalystardy uiymdastyrý jáne ótkizý tártibi týraly» zań jobasyna Parlament Senaty engizgen ózgerister men tolyqtyrýlardy qoldap, daýys berdi, – dep habarlaidy "Ult aqparat".
«Zańnama jáne sot, quqyqtyq reforma komiteti atalǵan zań jobasyna Parlament Senaty engizgen ózgerister men tolyqtyrýlardy qarap shyǵyp, myna jailardy atap ótedi. Senattyń túzetýleri Májilis maquldaǵan tujyrymdama men mazmundy ózgertpeidi ári onyń jekelegen normalaryn jaqsartýǵa baǵyttalǵan. Atap aitqanda respýblikalyq mańyzy bar qalalardyń, astananyń jáne oblystyq mańyzy bar ákimshilik ortalyq aýdandarynda beibit jinalystardy uiymdastyrýdyń arnaiy oryndarynyń mindetti sanyn belgileý, turmys-tirshilik nysandarynyń, kólik pen ózge de infraqurylymnyń jumys isteýiniń buzylýy, azamattardyń erkin júrip-turýyna kedergi keltirý siiaqty beibit jinalysty ótkizýden bas tartý negizin alyp tastaý usynylady. Óitkeni mundai kedergilerdi bilik naqty ári arnaiy oryndy belgileý kezinde eskerýi jáne olardyń aldyn alýy tiis», - dedi Zańnama jáne sot, quqyqtyq reforma komitetiniń múshesi, depýtat Qanat Mýsin Májilistiń jalpy otyrysynda.
Májilis depýtaty eger mundai buzýshylyqtar joiylsa beibit jinalysqa jekelegen qatysýshylardyń quqyqqa syiymsyz áreketterine bailanysty jinalysty toqtatýdy bolǵyzbaý jáne beibit jinalys barysynda densaýlyqty qorǵaýǵa arnalǵan jeke qorǵanys quraldaryn paidalanýǵa ruqsat berý usynylatynyn málim etti.
«Sonymen qatar zań jobasynyń jekelegen normalarynyń qurylymyn jetildirý maqsatynda túzetýler engizildi. Komitet «QR-da beibit jinalystardy uiymdastyrý jáne ótkizý tártibi týraly» zań jobasyna Parlament Senaty engizgen ózgerister men tolyqtyrýlarmen kelisýdi usynady», - dedi ol. Zań jobasy boiynsha Májilis depýtattary Senat engizgen ózgerister men tolyqtyrýlardy qoldap daýys berdi.
