QR Parlamenti Májilisinde Prezident bastamalyq etken aýdan ákimderin sailaý usynysy maquldandy, dep habarlaidy "Ult aqparat".
QR Ulttyq ekonomika ministri Áset Erǵaliev «Qazaqstan Respýblikasyndaǵy sailaý týraly» Qazaqstan Respýblikasynyń Konstitýtsiialyq zańyna ózgerister men tolyqtyrýlar engizý týraly» QR Konstitýtsiialyq zańy jobasyn tanystyrdy.
«Memleket Basshysynyń ótken jylǵy 1 qyrkúiektegi joldaýyndaǵy tapsyrmasyn iske asyrý barysynda elimizdiń aýdandyq mańyzy bar qalalardyń, aýyldardyń, kentterdiń, aýyldyq okrýgterdiń ákimderin tikelei sailaýyn engizý máseleleri boiynsha zań jobalary ázirlendi. Negizgi zań jobasynda «Sailaý týraly» Konstitýtsiialyq zańǵa ózgerister engizilý kózdelip otyr», - dedi Ulttyq ekonomika ministri Májilistiń jalpy otyrysynda.
Onyń aitýynsha, qazir elimizde 2345 ákimshilik-aýmaqtyq birlik bar. Ony ishinde, biylǵy ekinshi jartyjyldyqta 836 ákim tikelei daýys berý arqyly sailanatyn bolady.
«QR memlekettik qyzmet týraly zańnamasyna sáikes, biliktilik talaptaryna sai kelgen jáne 25 jasqa tolǵan elimizdiń kez kelgen azamaty sailana alady. Sondai-aq, saiasi partiia músheleri jáne sailaýshylardyń jalpy sanynyń keminde 1% paiyzyna qol jinaǵan kandidattar sailaýǵa túse alady. Bul rette, aýdan ákiminiń, eger kandidattar bolmaǵan ne bireýi ǵana usynylǵan jaǵdaida, eki ne bir kandidaty usynýǵa quqyǵy bar», - deidi Erǵaliev.
Zań jobasynda barlyq kandidattar úshin eń tómengi jalaqy mólsherinde sailaý jarnasyn engizý kózdelgen.
«Sailaý 40 kún buryn jariialanady, al sailaýdyń ózi qazirgi ákimniń ókilettik merzimi aiaqtalǵanǵa deiin 10 kún buryn ótedi. Sailaý ótkizilgennen keiin úsh kún ishinde qorytyndy shyǵarylady. Óz kezeginde sailanǵan ákim júrgizip jatqan jumysy úshin halyqqa esep beredi», - dedi Áset Erǵaliev.
Konstitýtsiialyq zań jobasyn Májilistiń jalpy otyrysyna qatysyp otyrǵan 95 depýtattyń barlyǵy maquldady.
