Parlament Májilisiniń jalpy otyrysynda «Qazaqstan Respýblikasynyń keibir zańnamalyq aktilerine Qarýly Kúshterdiń, basqa da áskerler men áskeri quralymdardyń arsenaldary, bazalary men qoimalary janyndaǵy tyiym salynǵan aimaqtar men tyiym salynǵan aýdandar máseleleri boiynsha ózgerister men tolyqtyrýlar engizý týraly» zań jobasy ekinshi oqylymda maquldandy, dep habarlaidy QazAqparat.
Zań jobasynyń negizgi maqsaty - Qarýly Kúshterdiń, basqa da áskerler men áskeri quralymdardyń oq-dárileri arsenaldarynyń, bazalary men qoimalarynyń qaýipsiz jumys isteýin, sondai-aq oq-dárilerdi saqtaý kezinde tótenshe jaǵdaidyń týyndaýy múmkin bolǵan jaǵdaida halyqty, azamattyq jáne basqa da infraqurylymdy qorǵaýdy qamtamasyz etý boiynsha zańnamany jetildirý.
«Qaralyp otyrǵan zań jobasynyń tujyrymdamasy biylǵy 26 naýryzda Májilistiń jalpy otyrysynda birinshi oqylymda maquldandy. Zań jobasymen jumys barysynda depýtattar birshama túzetýler engizdi», - dep toqtaldy Májilistiń Halyqaralyq ister, qorǵanys jáne qaýipsizdik komitetiniń tóraǵasy Muhtar Erman.
Zań jobasymen kelesi túzetýler eskerilgen:
- Qarýly Kúshterdiń, basqa da áskerler men áskeri quralymdardyń arsenaldary, bazalary men qoimalary ornalasqan jer ýchaskelerin jáne belgilengen tyiym salynǵan aimaqtar men tyiym salynǵan aýdandar sheginde olarǵa irgeles jatqan aýmaqtardy qorǵanys jáne ulttyq qaýipsizdik muqtajyna arnalǵan jerge jatqyzýǵa;
- Qarýly Kúshterdiń, basqa da áskerler men áskeri quralymdardyń arsenaldaryn, bazalary men qoimalaryn ornalastyrýǵa jáne olardyń qyzmeti úshin berilgen jer ýchaskelerin, sondai-aq belgilengen tyiym salynǵan aimaqtar men tyiym salynǵan aýdandar sheginde olarǵa irgeles jatqan aýmaqtardy jeke jáne zańdy tulǵalardyń ýaqytsha jer paidalanýyna berýge tyiym salýdy engizýge;
- sáýlet, qala qurylysy jáne qurylys isteri, sondai-aq memlekettik sáýlet-qurylys baqylaý jónindegi jergilikti atqarýshy organdardyń ózderine zańnamamen júktelgen talaptardy oryndamaǵany nemese tiisinshe oryndamaǵany úshin salynatyn ákimshilik aiyppul mólsherin jiyrmadan – júz ailyq eseptik kórsetkishke deiin, al qaitalap buzǵan kezde qyryqtan eki júzge deiin ulǵaitýǵa;
- zań jobasynda paidalanylatyn negizgi uǵymdardy naqtylaýǵa baǵyttalǵan.
Budan buryn habarlanǵandai, biyl naýryz aiynda Májilis «Qazaqstan Respýblikasynyń keibir zańnamalyq aktilerine Qarýly Kúshterdiń, basqa da áskerler men áskeri quralymdardyń arsenaldary, bazalary men qoimalary janyndaǵy tyiym salynǵan aimaqtar men tyiym salynǵan aýdandar máseleleri boiynsha ózgerister men tolyqtyrýlar engizý týraly» zań jobasyn birinshi oqylymda maquldaǵan bolatyn.
