Jumys isteitin, alaida májbúrli túrde eńbek demalysyna shyǵyp, kirisinen aiyrylǵan qazaqstandyqtar Memlekettik áleýmettik saqtandyrý qorynan (MÁSQ) tólem alady, dep habarlaidy "Ult aqparat" Eńbek jáne halyqty áleýmettik qorǵaý ministrliginiń baspasóz qyzmetine silteme jasap.
Eńbek jáne halyqty áleýmettik qorǵaý ministrligi Memleket basshysynyń tapsyrmasyna sáikes, tótenshe jaǵdai ýaqytynda kirisinen aiyrylǵan azamattarǵa jańa áleýmettik tólem berý tártibin ázirlegen.
«Jumys isteitin, alaida kirisinen aiyrylǵan, iaǵni TJ ýaqytynda májbúrli túrde eńbek tóleminsiz demalysqa shyqqan qazaqstandyqtar Memlekettik áleýmettik saqtandyrý qorynan (MÁSQ) tólem alady. Bir jumysshy úshin áleýmettik tólemniń mólsheri bir minimaldy jalaqyǵa – 42,5 myń teńgege teń (aiyna). MÁSQ-tan jańa tólem Qazaqstan aýmaǵynda eńbek etetin Qazaqstan azamattaryna beriledi», - dep habarlaidy ministrlikten.
Jańa áleýmettik tólemdi alý úshin azamattar mynadai sharttarǵa sai bolýy tiis:
- tótenshe jaǵdaidyń jariialanýyna bailanysty ailyǵy saqtalmai (jumystan shyǵarylmai) májbúrli túrde demalysqa jiberilgen jumysshylarǵa;
- tólemge ie bolý úshin jumysshy tótenshe jaǵdai engizilmei turyp sońǵy 12 aidyń kem degende úsh aiynda MÁSQ-ta aýdarymy bolýy kerek;
- áleýmettik tólem tek orta, shaǵyn jáne mikrobiznes jumysshylaryna beriledi.
Jańa áleýmettik tólemdi taǵaiyndaý úshin jumys berýshi jergilikti atqarýshy organǵa júginip, jumysshylarynyń kiristeriniń shynynda da toqtatylǵanyn rastaityn qujatty (jumysshylardyń tizimimen, tiisti buiryqpen birge) alyp kelýi tiis. Ótinimge sáikes jergilikti shtab jumys berýshige áleýmettik qoldaý kórsetý týraly sheshim qabyldaidy. Al «Azamattarǵa arnalǵan Úkimet» bólimshesi jumysshylardyń tizimin ózdigimen jasaidy. Áleýmettik tólem jumysshyǵa tótenshe jaǵdai ýaqytynda, ailyǵy tólenbei eńbek demalysyna shyqqan jaǵdaida ǵana beriledi.
«Óz kezeginde qazirgi zańnamaǵa sáikes jumyssyz qalǵan azamattar mindetti áleýmettik saqtandyrý jáne kiris júiesinde sońǵy 24 aidaǵy qatysý deńgeiine qarai 1-6 ai kóleminde áleýmettik tólemge ie bolady. Ol úshin jumyssyz qalǵan azamat jergilikti jumyspen qamtý ortalyǵyna baryp, jumyssyz retinde tirkelýi kerek. Tólem avtomatty túrde beriledi», - dep habarlaidy ministrlikten.
