Aqmola oblysynyń Stepnogorsk qalasynda kámeletke tolmaǵan balalarǵa qatysty qorlaý faktisi áleýmettik jelide qyzý talqylanyp jatyr. Aldyn ala málimet boiynsha, eki jasóspirim ózderinen kishi balalardy qorqytyp, olardy bir-birine súiisýge májbúrlegen. Politsiia oqiǵaǵa bailanysty tekserý júrgizip jatyr, dep habarlaidy ult.kz.
Bul týraly 31-arnanyń «Informbiýro» baǵdarlamasy habarlady.
Ata-analardyń aitýynsha, jasóspirimder balalardy ońasha jerge aparyp, qysym kórsetken. Sondai-aq bolǵan jaǵdaidy telefonǵa túsirip, tikelei efirde kórsetkeni týraly aqparat bar.
Oqiǵaǵa bailanysty politsiia tekserý júrgizip jatqanyn rastady. Quqyq qorǵaý organdary bolǵan jaǵdaidyń barlyq mán-jaiyn anyqtaýda.
Ata-analar arasynda bul oqiǵa balalar arasyndaǵy býlling máselesin qaita kóterdi. Olardyń pikirinshe, mundai jaǵdailardyń barlyǵy birdei quqyq qorǵaý organdaryna jetpeidi. Keibir jaǵdaida mektepterdegi býlling faktileri tiisti deńgeide tirkelmei qalýy múmkin.
«Pedsoiýz.kz» belsendi ata-analar men pedagogtar qozǵalysy blogynyń ákimshisi Elena Bantikovanyń aitýynsha, mektep psihologtaryna túsetin júkteme kóp. Sondyqtan olar barlyq oqýshynyń máselesine der kezinde kóńil bóle bermeidi.
Oqý-aǵartý ministrligi Balalardyń quqyqtaryn qorǵaý komitetiniń ókili Raýshan Kozkeevanyń málimetinshe, mektepterde býllingtiń aldyn alýǵa baǵyttalǵan «DosbolLIKE» baǵdarlamasy júzege asyrylyp jatyr. Ministrlik deregine sáikes, bilim berý ortasynda ózin qaýipsiz sezinetin oqýshylardyń úlesi 2 paiyzǵa artqan. Al áleýmettik oqshaýlaný men elemeý kórsetkishi 1,5 paiyzǵa tómendegen. Sonymen qatar býlling jaǵdailaryn anyqtaý kórsetkishi ósken.
Alaida mamandar býlling máselesin tek faktilerdi anyqtap, kinálilerdi jazalaýmen sheshý múmkin emes ekenin aitady.
Klinikalyq psiholog Tatiana Liýbchanskaianyń pikirinshe, býllingke qatysýshylardyń barlyǵymen – jábirlenýshimen de, qysym kórsetken balamen de, oqiǵany syrttai baqylap, únsiz qalǵandarmen de jumys isteý qajet.
Mamannyń aitýynsha, qazirgi tańda býllingtiń bir bóligi áleýmettik jelilerge aýysyp, onyń belgilerin ata-analar balanyń psihologiialyq nemese fizikalyq jaǵdaiy nasharlaǵannan keiin ǵana baiqaityn jaǵdailar bar.
Sarapshylardyń pikirinshe, balalar arasyndaǵy álimjettiktiń aldyn alý úshin mektep, ata-ana, psiholog, quqyq qorǵaý organdary jáne qoǵam birlesip jumys isteýi qajet. Stepnogorskidegi oqiǵa boiynsha politsiia tekserýiniń qorytyndysy ázirge belgisiz.
