Qazaqstannyń halyq ártisi Maqpal Júnisova QR Prezidenti Is basqarmasy Meditsinalyq ortalyǵynyń Ulttyq gospitalindegi tirkeýden shyǵýǵa nietti ekenin aitty. Ánshi meditsinalyq mekeme qyzmetkerleriniń qaita-qaita habarlasyp, tekserýden ótýge shaqyratynyna qatysty pikir bildirdi, dep habarlaidy ult.kz.
Óner iesiniń sózinshe, halyq arasynda “Sovmin” degen ataýmen belgili meditsinalyq mekemege ol 1994 jyldan beri tirkelgen. Munda halyq ártisteri men eńbek sińirgen ártister de meditsinalyq qyzmet ala alady.
Alaida Maqpal Júnisova osy ýaqytqa deiin gospital usynatyn keibir jeńildikterden beihabar bolǵanyn jetkizdi. Atap aitqanda, ánshi jyl saiyn sanatoriige tegin joldama alý múmkindigi bar ekenin jaqynda ǵana bilgen.
“Jyl saiyn sanatoriilerge tegin joldama beriletinin endi bildim. Biz de barýymyz kerek eken. Biraq osy ýaqytqa deiin onyń bireýin de paidalanǵan emespin. Nege maǵan aitpaǵan dep tańǵaldym”, – dedi ol.
Ánshiniń aitýynsha, búginde ol densaýlyǵyn teksertý úshin memlekettik gospitalǵa barmaidy. Qajetti meditsinalyq taldaýlardy úiiniń mańyndaǵy jeke klinikalarda tapsyrady. Al kúrdeli em qajet bolǵan jaǵdaida Koreia nemese Túrkiiadaǵy meditsinalyq mekemelerge júginetinin jasyrmady.
Soǵan qaramastan Ulttyq gospital qyzmetkerleri oǵan turaqty túrde habarlasyp, josparly meditsinalyq tekserýden ótý qajettigin eskertip otyrady eken. Bul jaǵdai ánshiniń kóńilinen shyqpaǵan.
“Denimiz saý, shaýyp júrmiz. Kúnde jumys, gastrol, kontsert bar. “Sovminniń” qyzmetkerleri qaita-qaita qońyraý shalyp, analiz tapsyryp, tekserýden ótý kerektigin aitady. “Qyzdar, denim saý, Qudai aýyrtpasyn, bári durys” desem, “Kelmeseńiz, tirkeýden shyǵaramyz” deidi. Men de shyǵara berińder dedim”, – dep túsindirdi halyq ártisi.
Aita keteiik, Dizainer Nazym Qarpyqova Maqpal Júnisovanyń synyna jaýap berdi.
https://ult.kz/kz/post/dizainer-nazym-qarpyqova-maqpal-zunisovanyn-synyna-zauap-berdi
Maqpal Júnisova kim?
Maqpal Júnisova – qazaq estradasynyń kórnekti ókilderiniń biri, Qazaqstannyń halyq ártisi. Ol ulttyq án ónerin damytýǵa jáne qazaq mýzykasyn keńinen nasihattaýǵa eleýli úles qosqan óner iesi.
Maqpal Muhamediiarqyzy Júnisova 1964 jyly 11 qańtarda Qaraǵandy oblysynda dúniege kelgen. Bala kezinen ánge jaqyn bolyp, keiin kásibi mýzykalyq bilim aldy. Óner jolynda halyq ánderin, qazaq kompozitorlarynyń týyndylaryn jáne estradalyq shyǵarmalardy oryndap, kópshilikke tanyldy.
Shyǵarmashylyq mansabyn “Gúlder” ansamblinde bastap, keiin “Qazaqkontsert” birlestiginde eńbek etti. “Ǵashyq júrek”, “Qyz ǵumyr”, “Fariza qyz”, “Qoshtasý”, “Aqqý sazy” sekildi ánderi arqyly tyńdarman yqylasyna bólendi. 1994 jyly Qazaqstannyń halyq ártisi ataǵyn alyp, 1999 jyly Memlekettik syilyqtyń laýreaty atandy. Ánshi halyqaralyq baiqaýlarda da birneshe márte júldeger boldy.
Maqpal Júnisova 2026 jylǵy mamyrda II dárejeli “Barys” ordenimen marapattaldy. Ol búginde de kontsertterge qatysyp, shyǵarmashylyq qyzmetin jalǵastyryp keledi.
