Belkanto patshaiymy, «Astana Operanyń» jetekshi solisi Maira Muhamedqyzy jeke onlain-kontsertin berdi. Opera divasynyń kúshti de qýatty energetikasynyń arqasynda senbilik kesh naǵyz teatrlyq shattyqqa ainaldy, - dep habarlaidy teatrdyń baspasóz qyzmeti.
Qazaqstannyń eńbek sińirgen ártisi, QR Memlekettik syilyǵynyń laýreaty Maira Muhamedqyzy baǵdarlamany sátti tańdaǵan. Jekelegen bir bólim jan jylýy men uiymshyldyq sezimin týdyratyn «Búldirgen», «Aq Kóilek», «Al Qońyr», «Sáýlem-ai» syndy qazaq halyq ánderine arnalǵan.
Qazaqtelekomnyń YouTube arnasynyń Live formatyndaǵy tikelei efirinde áigili ánshiniń syńǵyrlaǵan taza daýysy men minsiz oryndaýynda Abai Qunanbaevtyń «Kózimniń qarasy», Muratbek Begalievtyń «Ysyq kóldý saǵyný», Abdýlla Toqaidyń «Ana tili» jáne t.b. shyǵarmalar shyrqaldy. Uiǵyr ári qytai halyq ánderi baǵdarlamanyń sánin keltirdi.
Opera divasy kún saiyn vokaldyq sheberligin shyńdaý, ónerdiń syrlaryna tereń boilaý arqyly halyqtyń zor mahabbatyna ie boldy. Onyń qajyrly eńbegi, repertýaryn keńeitýge baǵyttalǵan jumystary, tynymsyz shyǵarmashylyq ideialardy izdestirýi óz jemisin berdi. Sirá, búgingi tańda onyń esimin bilmeitin adam joq shyǵar. Halyqtyń súiiktisi, Qazaqstannyń vokaldyq óneriniń álemdegi laiyqty ókili. Sondai-aq Maira Muhamedqyzy – dúnie júziniń opera ánshileriniń kúrdeli de bedeldi shyǵarmashylyq jarysy – Máskeýdegi P.Chaikovskii atyndaǵy halyqaralyq baiqaýdyń laýreaty (1998) atanǵan jalǵyz qazaqstandyq opera oryndaýshysy.
Tamasha vokaldyq sheberlikten bólek, kórermender osy keshte keremet aspapshylardyń da sheber oryndaýshylyǵyn baǵalai aldy – Tsezar Kiýidiń «Tsarskoselskaia statýia», Petr Chaikovskiidiń «Kolybelnaia pesn v býriý» kompozitsiialarynyń syrly interpretatsiialaryn kóptegen halyqaralyq baiqaýlardyń laýreaty arfashy Diliara Qaldybaeva usynsa, Qazaqstannyń eńbek sińirgen qairatkeri Elmira Ahmediarova kontsertte fortepiano partiiasyn oryndady.
Eske salar bolsaq, QR Mádeniet jáne sport ministrligi «Qazaqtelekom» AQ-men birlesip, Live formatynda «Karantindegi juldyz» jobasyn sátti júzege asyrýda. Kórermender ártistermen pikir jazý arqyly suhbattasady. Kontsertter ashyq ári barshaǵa qoljetimdi túrde tegin ótkiziledi.
Soprano daýysynyń iegeri, «Astana Opera» solisi Mádina Islamovanyń da onlain-kontserti 1 sáýir kúni @etalents.pro tikelei efirinde ótti. Áleýmettik jelidegi óziniń paraqshasynda ánshi «mýzyka adamnyń jan-dúniesin emdeidi» dep atap ótken. Onyń oryndaýynda onlain-aýditoriia nazaryna qazaqtyń halyq ánderi «Balqadisha», «Iapyrai», «Naz qońyr», sondai-aq E.Brýsilovskiidiń «Qyz Jibek» operasynan «Tolqyma», «Gákký» jáne taǵy basqa kóptegen týyndylar usynyldy.
Tyńdarmandar ózderiniń pikirlerinde osynaý qiyn-qystaý kezeńde asqaq ónerdiń qudireti arqyly kóńil-kúi men kúsh-qýat syilaǵany úshin «Astana Opera» ártisterine alǵystaryn bildirdi.
