Biologiialyq qaýipsizdik máseleleri jónindegi ǵylymi-zertteý institýtynyń bas direktory maimyl sheshegine qarsy vaktsina ázirleýge daiyn ekenderin aitty, dep habarlaidy QazAqparat tilshisi.
Kúnsulý Zákariianyń aitýyna qaraǵanda, Biologiialyq qaýipsizdik máseleleri jónindegi ǵylymi-zertteý institýty Poxviridae virýstar tobyn talai jyldan beri zerttep keledi. Onyń ishinde Capripoxvirus tarmaǵy da bar. Bul tarmaqqa qoi men eshki sheshegi, teridegi túiindi bórtpe kiredi. Sondai-aq taýyq, kógershin, siyr, túie jáne maimyl sheshegi kiretin Avipoxvirus tarmaǵy da atalmysh institýttyń únemi nazarynda bolǵanǵa uqsaidy.
«Zertteý jumystarynyń nátijesinde qoi sheshegine, eshki sheshegine, teriniń túiindi bórtpesine, túie sheshegine, taýyq sheshegine qarsy vaktsinalar ázirlendi. Olar Qazaqstannan bólek postkeńes elderi veterinariia salasynda keńinen qoldanylyp júr. Institýt óziniń 63 jyldyq tarihynda asa qaýipti infektsiialyq aýrýlardyń respýblikalyq depozitariin qalyptastyrǵan. Ol qorda túrli janýarlardyń sheshek synamalary da saqtalǵan», - dedi ǵalym QazAqparat tilshisine bergen suhbatynda.
Institýttyń bas direktory qazir eldiń nazary aýyp turǵan maimyl sheshegine qarsy vaktsina jasaý múmkindikterine toqtaldy.
«Sheshek virýsymen jumys istep jáne sheshek aýrýlaryna qarsy ekpe jasap jinaǵan tájiribemiz bolǵandyqtan, bizdiń institýtta maimyl shesheginen qorǵaityn vaktsina jasaý boiynsha zertteý júrgizýdiń búkil múmkindikteri bar», - dedi Kúnsulý Zákariia.
Sondai-aq atalǵan vaktsinany jasap shyǵarý úshin arnaiy ǵylymi-zertteý baǵdarlamasy qajet ekenin aitty. Ol baǵdarlamany memleket qarjylandyryp, tapsyrma berý arqyly qoldaý kórsetýi qajet kórinedi.
Densaýlyq saqtaý ministrliginiń sońǵy derekteri boiynsha, Qazaqstanda maimyl shesheginiń yqtimal faktileri tirkelmegen. Al Kúnsulý Zákariia basqaratyn Biologiialyq qaýipsizdik máseleleri jónindegi ǵylymi-zertteý institýtynyń ujymy «QazVac» atty COVID-19 infektsiiasyna qarsy otandyq vaktsinany jasap shyǵarǵanyn qazaqstandyqtar jaqsy biledi. Elimizde osy otandyq vaktsinanyń 500 myń dozasyn shyǵarý múmkindigi bar. qazir atalǵan vaktsinany Dúniejúzilik densaýlyq saqtaý uiymynyń tirkeýinen ótkizý jumystary júrip jatyr.
