Foto: pixabay.com
Sot "Maiqaiyńaltyn" AQ aýmaǵynda avtobýstyń shuńqyrǵa qulap ketýi saldarynan qaza tapqan qutqarýshynyń týystarynyń quqyǵyn qorǵady. Bul týraly "Almaty" telearnasy habarlaidy.
Ekibastuz qalalyq sotynyń baspasóz qyzmetinen habarlanǵandai, qaza tapqandar – "Kásibi áskerilendirilgen avariialyq-qutqarý qyzmetteriniń respýblikalyq ortalyq shtaby" JShS-niń qyzmetkerleri.
Osy fakt boiynsha quralǵan komissiia jazataiym oqiǵaǵa tekserý júrgizip, onyń qorytyndysy boiynsha jumys berýshiniń kinási – 100%, jumyskerlerdiń kinási 0% ekeni anyqtaldy.
"Qaitys bolǵan qutqarýshy T.-nyń anasy, qyzy, uly jáne ápkesi qyzmettik mindetterin atqarý kezinde onyń qaitys bolýyna bailanysty moraldyq ziiandy óteý týraly talap qoiýmen sotqa júgindi.
Moraldyq ziian olardyń moraldyq azap shegýinen, ulynan, ákesinen, aǵasynan aiyrylýynyń aýyrlyǵynan, jerleý kezinde onymen qoshtasýǵa múmkindik bolmaýynan, jumys berýshiniń kóńil aityp, qoldaý kórsetpeýinen bolyp otyr", - delingen sot habarlamasynda.
Sot bolǵan jazataiym oqiǵaǵa jumys berýshiniń 100% kinásin negizge ala otyryp, qaitys bolǵan qutqarýshynyń týystarynyń talaptaryn tolyq kólemde qanaǵattandyryp, árbir týysynyń paidasyna qoiylǵan talap kóleminde 30 000 000 teńgeden, jalpy somasy 120 million teńge moraldyq ziiandy óndirdi. Sheshim zańdy kúshine engen joq.
Eske salaiyq, qaiǵyly oqiǵa 2024 jylǵy 4 qańtarda bolǵan edi. "Maiqaiyńaltyn" AQ aýmaǵyndaǵy shaqyrtý boiynsha ketip bara jatqan úsh qutqarýshy men júrgizýshisi bar avtobýs shuńqyrǵa qulap ketken bolatyn.
