Jýyrda otandyq jýrnalisterdiń biri óziniń Instagram paraqshasynda Sáken Maiǵazievtiń gonorar retinde alǵan 5 mln teńgesin qaiyrymdylyqqa bergenin jazdy. Ánshiniń ózi bul jaitty jasyrsa da, jýrnalist jazbany bul týraly barsha Qazaqstan bilýi tiis degen nietpen jariialaǵanyn túsindirdi. Keiin jýrnalistiń bul sózderin ánshiniń ózi de rastap, kóp aqshanyń ózine qaidan kelgenin túsindirdi, dep jazady Sputnik Qazaqstan.
Ánshi bul somany Qazaqstandaǵy bedeldi kompaniianyń tanystyrýshysyna ainalǵandyqtan alǵan.
"Jýrnalist qaryndasymnyń bul oqiǵany óz paraqshasynda bólisip, keiin jariialaǵany úshin keshirim suraǵany bar. Ol "Aǵa, jariialaǵanyma renjimeńiz, odan sizdiń saýabyńyzdy Alla qalasa kemitpes, ishtegi nietińiz belgili ǵoi. Múmkin bul áreketińizben basqa adamdardyń jaqsy isine sebepshi bolarsyz" dep aitty maǵan", — dep Sáken Maiǵaziev muny jurtqa jariia etkisi kelmegeni týraly jazdy.
Ári qarai juldyz muny dáýleti asyp-tasyǵannan jasamaǵanyn, óziniń de jaqyndary materialdyq qundylyqtarǵa muqtaj ekenin jetkizdi.
"Nesiesi bar týystarym da bar. Iaǵni eshkimniń tórt qabyrǵasy túgel emes. Aǵa-ápke, ini-qaryndastarym da qinalyp júr. Dese de, bizdiń áýletimizden de nashar ómir súrip jatqan qanshama otbasy bar. Sol adamdarǵa septigim tigenin qaladym", — dep sózin jalǵady ánshi.
Dese de, Maiǵaziev áleýmettik jelide kez kelgen adamǵa kómek qolyn soza bermeitinin jetkizdi. Kómek týraly ótinishti jarnamalamas buryn ábden oilanady eken.
"Jarnama jasap berý jóninde qandai usynys tússe de, jeti ret ólshep bir ret kesýge tyrysamyn. Ózim jetik bilmeitin, kúmándy dúnielerge múldem jolamaimyn. Men úshin meni oqyp otyrǵan oqyrmandarymnyń senimi áldeqaida qymbat. Shynymen halyqqa paidaly dúnie bolsa, keide qoldaý kórsetip, eshkim suramasa da jarnamalap jatamyn ózim-aq", — dedi ol.
