Máýlen Saǵathanuly Áshimbaevtyń kandidatýrasyn Senat tóraǵalyǵyna laiyqty dep sanaimyn. Búgin Parlament Senatynyń otyrysynda sóz sóilegen Memleket basshysy Qasym-Jomart Toqaev osylai aitty, dep habarlaidy QazAqparat.
Otyrys barysynda QR Prezidenti búgingi kezde elimizde júzege asyp jatqan mańyzdy reformalar týraly aita kele, onda Parlamenttiń, ásirese, Senattyń róli de, quzyreti de erekshe ekenine toqtaldy.
«Senattyń eń basty mindeti – sapaly zańdardy qabyldaý. Mundai zańdar reformalarǵa jol ashady, turaqtylyq pen tártipti qamtamasyz etedi. Senat depýtattary zań jobalaryn talqylaý kezinde nemese basqa formattaǵy basqosýlar barysynda qoǵamymyzdaǵy eń ózekti, eldi alańdatatyn máseleler jóninde ótkir oilar, syni pikirler aitýǵa quqyly. Bul másele boiynsha daý joq. Bul rette, sizderdiń jumystaryńyz óte jaýapty ekenin jaqsy bilemin. Ózderińizge málim, meniń Jarlyǵymmen Senat depýtaty Dariǵa Nursultanqyzy Nazarbaevanyń ókilettigi toqtatyldy. Ol Senat tóraǵasy retinde bir jyldan astam belsendi ári jemisti jumys istedi. Sol úshin Dariǵa Nursultanqyzyna rizashylyǵymdy bildirdim», - dedi Qasym-Jomart Toqaev.
«Meniń Jarlyǵymmen Máýlen Saǵathanuly Áshimbaev Senat depýtaty bolyp taǵaiyndaldy. Konstitýtsiianyń 58-shi babynyń 1-shi tarmaǵyna sáikes Parlament Senatynyń tóraǵasy laýazymyna Máýlen Saǵathanuly Áshimbaevtyń kandidatýrasyn usynamyn. Ol memleket qyzmetiniń qyr-syryn jetik meńgergen, uzaq jyl túrli salada jemisti jáne tiimdi jumys atqardy. Parlament jumysyn jaqsy biledi. Árdaiym ózine júktelgen mindetterdi abyroimen atqaryp keledi. Memlekettik qyzmettegi tájiribesi mol. Sondyqtan, bul qyzmetti abyroimen atqaratynyna kúmánim joq. Máýlen Saǵathanuly Áshimbaevtyń kandidatýrasyn Senat tóraǵalyǵyna laiyqty dep sanaimyn», - dedi Memleket basshysy Senat otyrysynda sóilegen sózinde.
Eske sala keteiik, búgin QR Prezidenttiń usynysy boiynsha senatorlar jasyryn daýys berý arqyly Máýlen Áshimbaevty Parlament Senatynyń tóraǵasy etip biraýyzdan sailady.
