Qazaqstan Parlamenti Senatynyń tóraǵasy Máýlen Áshimbaev elimizge resmi saparmen kelgen Resei Federaldy Jinalysy Federatsiia Keńesiniń tóraiymy Valentina Matvienkomen kezdesti, dep habarlaidy "Ult aqparat" Senattyń baspasóz qyzmetine silteme jasap.
Kezdesýdi ashqan Máýlen Áshimbaev elderimiz arasyndaǵy qarym-qatynas tolyǵymen HHI ǵasyrdaǵy tatý kórshilik jáne odaqtastyq týraly sharttyń qaǵidalaryna sáikes damyp kele jatqanyn atap ótti.
«Ótken jyldar ishinde elderimiz arasynda strategiialyq seriktestiktiń berik irgetasy qalandy. Buǵan, eń aldymen, Qazaqstan Prezidenti Qasym-Jomart Toqaev pen Resei Prezidenti Vladimir Pýtinniń jeke dostyq jáne ózara senimge negizdelgen qatynasy zor yqpalyn tigizýde. Memleketaralyq bailanysty nyǵaitýǵa Qazaqstan Respýblikasynyń Tuńǵysh Prezidenti – Elbasy Nursultan Ábishuly Nazarbaev ta basa mán berip keledi», – dedi Máýlen Áshimbaev.
Senat ǵimaratynda ótken kezdesýde suhbattasýshylar ekijaqty yntymaqtastyqty odan ári tereńdetýge qatysty mańyzdy máselelerdi keńinen talqylady.
Óz sózinde Valentina Matvienko eki el arasynda parlamentaralyq yntymaqtastyqtyń joǵary deńgeide damyp kele jatqanyna nazar aýdardy.
«Elderimizdiń parlamentaralyq yntymaqtastyǵyn nyǵaitýǵa basa mán berip kelemiz. Oǵan halyqaralyq parlamenttik alańdarda, onyń ishinde Parlamentaralyq assambleialardaǵy ózara tiimdi is-qimylymyz dálel. Osy rette Qazaqstan delegatsiiasynyń Parlamentaralyq assambleialar quramyndaǵy tiimdi jumysyn erekshe atap ótken jón. Qazaqstandyq sarapshylar modeldik zań jobalaryn ázirleýge, monitoring missiiasyna jáne TMD Parlamentaralyq assambleiasy komissiiasynyń jumysyna belsendi qatysyp keledi», – dedi Valentina Matvienko.
Sonymen qatar is-shara barysynda Qazaqstan men Reseidiń kópjosparly qarym-qatynasyn zańnamalyq turǵydan qoldaýdyń mańyzdy ekeni aityldy. Odan bólek, taraptar pandemiiamen kúres kezinde eki elde qabyldanǵan sharalarǵa toqtalyp ótti. Sondai-aq, saýda-ekonomikalyq, mádeni-gýmanitarlyq jáne taǵy basqa salalar boiynsha bailanysty arttyrý máseleleri sóz boldy.
Kezdesýde parlamentaralyq yntymaqtastyqty nyǵaitý máselesine erekshe ekpin berildi. Máýlen Áshimbaev ekologiia, tsifrlyq damý, ǵylym jáne taǵy basqa baǵyttar boiynsha birlesken sharalardy talqylaý jáne iske asyrý úshin Palatalar arasyndaǵy ózara is-qimyldy arttyrýdy usyndy.
«Biz parlamentaralyq yntymaqtastyǵymyzdy naqty ister arqyly damytýǵa daiynbyz. Sapar aiasynda kóteriletin máselelerdiń bári eki eldiń bailanysyn arttyrý úshin asa mańyzdy», – dedi Máýlen Áshimbaev.
Máýlen Áshimbaev Qazaqstan Senaty agroónerkásip keshenin órkendetýdi zańnamalyq turǵydan qamtamasyz etý máselesinde de tájiribe almasýǵa múddeli ekenin jetkizdi. Onyń aitýynsha, elimizdiń ekonomikalyq damýynda agroónerkásiptik keshenniń áleýeti zor. Sondyqtan qazaqstandyq senatorlar bul salaǵa basymdyq berip otyr.
Sondai-aq, Senat spikeri bilim jáne ǵylym salasyn jetildirýdi zańnamalyq qoldaýda birlesip jumys isteýdiń ózara tiimdi ekenin tilge tiek etti.
«Qazirgi tańda ǵylym ekonomikalyq ósim men memleket damýynyń negizgi faktorlarynyń birine ainalyp otyr. Ǵylymi zertteýlerdiń qoldanbaly nátijesin arttyrý mańyzdy mindet bolyp sanalady. Soǵan bailanysty Qazaqstan Senaty «Ǵylym» týraly zańǵa ózgerister engizý jáne normalardy jetildirý úshin jumys júrgizýde. Osy máselede salalyq komitet depýtattarynyń reseilik áriptesterimen ózara tájiribe almasýynyń mańyzy zor», – dedi Máýlen Áshimbaev.
Ol osy maqsatpen tiisti komitetterdiń birlesken onlain-otyrystaryn uiymdastyrýdy jáne saraptamalyq-taldamalyq salada tájiribe almasýdy júieli jolǵa qoiýdyń bereri mol ekenin de atap ótti.
Aita keteiik, erteń Resei depýtattarynyń resmi sapary aiasynda Qazaqstan Parlamenti Senaty men Resei Federaldy Jinalysynyń Federatsiia Keńesi arasyndaǵy Yntymaqtastyq jónindegi komissiianyń 16-otyrysy ótedi dep josparlanyp otyr.
