«Nur Otan» partiiasy Tóraǵasynyń Birinshi orynbasary Máýlen Áshimbaev Nursultan Nazarbaevtyń Qazaqstan Respýblikasynyń Prezidenti retindegi ókilettigin toqtatý jónindegi sheshimine qatysty pikir bildirdi. Bul týraly ol óziniń Facebook-tegi paraqshasynda jazdy.
Máýlen Áshimbaev barlyq qazaqstandyqtar siiaqty óziniń de ekiudai sezimde otyrǵanyn aityp, ókinishin bildirgen. Sondai-aq ol Elbasynyń erligi men aqyly qurmet tutýǵa ábden laiyq ekenin aitady.
«Bárimiz bul sheshimniń aiaqasty qabyldanbaǵanyn bilemiz. Nursultan Ábishulynyń bul qadamdy qansha saǵat, neshe kún oilanyp jasaǵanyn tek oimen ǵana shamalaýǵa bolady. Buǵan deiin de Elbasy memleket pen halyq múddesi úshin árdaiym durys sheshimder qabyldap kelgeni belgili. Sondyqtan bárimiz bul sheshimge qurmetpen qarap, Tuńǵysh Prezident saiasatynyń jalǵasýy úshin qoldan kelgendi jasaýymyz kerek. Bul – qazaqstandyqtardyń Tuńǵysh Prezidenttiń tulǵasy men qyzmetine kórsetken qurmeti bolady», – deidi Máýlen Áshimbaev.
Sonymen qatar ol Elbasynyń Qaýipsizdik Keńesiniń Tóraǵasy, «Nur Otan» partiiasynyń Tóraǵasy, Konstitýtsiialyq keńestiń múshesi retinde el damýyndaǵy mańyzdy rólin saqtap qalatynyn da tilge tiek etken.
«Nursultan Ábishuly Nazarbaev Elbasy, Ult Kóshbasshysy bolyp qala beredi. Ol – táýelsiz Qazaqstannyń negizin qalaýshy, el ishinde jáne álem sahnasynda bedeli joǵary saiasatker. Keńes Odaǵynan keiin qarqyndy damý deńgeiindegi ekonomikasy bar turaqty jáne áleýmettik memleket qurǵan tulǵa. Qazaqstannyń Tuńǵysh Prezidentiniń jigeri men batyl sheshimder qabyldaý qabiletiniń arqasynda elimiz táýelsiz memleket bolyp qalyptasty. Halqymyz Elbasynyń basshylyǵymen 90-jyldardaǵy stagnatsiia men saiasi kollapsty jeńdi. Elbasynyń eńbekqorlyǵy men batyldyǵy eń qiyn synaqtardan, álemdik saiasi jáne qarjylyq daǵdarystardan ótýge kómektesti. Otyz jyl ishinde Nursultan Nazarbaev álem kartasynda jańa ári zamanaýi memleket qurdy», – delingen jazbada.
Sondai-aq Máýlen Áshimbaev qiyn-qystaý jyldarda Tuńǵysh Prezident saiasatynyń arqasynda el ekonomikasyna milliardtaǵan dollar investitsiialar quiylyp, ondaǵan myń jańa jumys oryndary ashylǵanyn, sonyń nátijesinde memlekettiń damýyna jaqsy negiz qalyptasqanyna nazar aýdarǵan.
«Nur Otan» partiiasy Tóraǵasynyń Birinshi orynbasary Elbasynyń osy igi bastamalaryn laiyqty jalǵastyrý barsha qazaqstandyqtardyń mindeti ekenin aityp: «Qazaqstan úshin mańyzdy tarihi kezeńde halqymyz birlik pen jalpyhalyqtyq kóshbasshynyń baǵytyna qoldaý tanytýy kerek. Aldymyzda elimizdiń damýy men azamattarymyzdyń ómir sapasyn arttyrýǵa baǵyttalǵan kóp mindet tur. Barlyq qazaqstandyqtardy bir kisidei jumylyp, qoǵamdyq kelisimdi saqtaýǵa shaqyramyz. Bul kezeńnen birge ótip, sózimizben jáne isimizben Elbasy saiasatyna tolyqtai qoldaý bildirýimiz qajet. Ortaq Otanymyz – Qazaqstan Respýblikasynyń ary qaraiǵy damýy men gúldenýi bárimizge tikelei bailanysty», – dep jazǵan.
