Bul týraly búgin «Nur Otan» partiiasynyń Ortalyq apparatynda ótken jiynda aityldy. Atalǵan basqosýda Elbasynyń Joldaýy men Bes áleýmettik bastamanyń júzege asyrylý barysy jáne partiialyq baqylaý mehanizmderi talqylanǵan bolatyn.
Jiyn barysynda «Nur Otan» partiiasy Tóraǵasynyń Birinshi orynbasary Elbasy Joldaýy men Bes áleýmettik bastamanyń júzege asyrylý barysyndaǵy keibir máselelerge erekshe toqtalyp ótti. Aldymen ol osy shaǵyn nesie berý isindegi olqylyqtarǵa nazar aýdardy. Onyń aitýynsha, búginge deiin 13 myńnan astam azamat shaǵyn nesie alyp, jospardyń 98 paiyzy oryndalǵan. Sonyń nátijesinde 52 mlrd. teńge igerilgen eken.
– Bul jaman kórsetkish emes. Degenmen, nátijelerdi saraptap qaraityn bolsaq, kúrmeýi qiyn máselelerdiń de bar ekenin kóremiz. Mysaly, shaǵyn nesie berý bastamasy aýyldyq jerlerde nátijeli júzege asyrylyp jatyr. Al qalalyq jerlerdegi kórsetkish kóńil kóńshitpeidi. Búginde qalalyq jerler úshin josparlanǵan 3 myń adamnan tek 1 myń azamatqa ǵana shaǵyn nesie berilgen, – dedi Máýlen Áshimbaev.
Sondai-aq ol «7-20-25» baǵdarlamasy boiynsha da atqarylǵan jumystarǵa nazar aýdardy. Onyń sózine qaraǵanda, 6 jeltoqsanǵa deiingi derek boiynsha baǵdarlamaǵa qatysý úshin 5 myńnan astam ótinim kelip túsken. Sonyń ishinde jalpy somasy 40 mlrd. teńgeni quraityn 3,5 myńǵa jýyq ótinim maquldanǵan. Áitse de, bul bastama boiynsha da óńirlerdegi jaǵdai árkelki. Máselen keibir aimaqtarda jergilikti atqarýshy organ tarapynan arnaiy sanattaǵy azamattarǵa bastapqy jarna úshin sýbsidiia bólý jumystary oidaǵydai júrgizilmeýde.
Budan basqa, «7-20-25» baǵdarlamasy boiynsha jańadan salynǵan úilerdiń jetispeýi jáne kei aimaqtardaǵy aqparattyq-túsindirý jumystarynyń álsizdigi siiaqty máseleler de aityldy. Odan bólek, turǵyn-úi kommýnaldyq sharýashylyq máselesinde de olqy tustardyń bar ekeni sóz boldy.
Máýlen Áshimbaev osyndai ózekti máseleler bola tura, partiia filialdary men partiialyq kýratorlardyń únsiz otyrǵanyn synǵa aldy.
– Bizdiń barlyq oblys pen aýdanda filialdarymyz bar. Barlyq óńirde partiialyq kýratorlarymyz ben óńirlik Qoǵamdyq keńester jumys isteidi. Endeshe nege olar osy máselelerdi ákimdikterdiń aldynda kótermeidi? Árine, bul jerde júieli máselelerdiń de bar ekenin bilemiz. Máselen, keibir azamattardyń nesie tarihyna bailanysty olardyń nesie alý múmkindikteri tómen ekeni belgili. Soǵan qaramastan biz bul máselelerdi shaǵyn nesie berýmen tikelei ainalysatyn «Damý» qorynyń jáne úilestirýshi organ Ulttyq ekonomika ministrliginiń aldyna másele etip qoiyp, tiisti sheshimder qabyldaýǵa tiispiz. Qajet bolsa, zańnamalarǵa túzetýler engizýge de bastamashyl bolýymyz kerek. Eń bastysy, shaǵyn nesie berýdi qalalyq jerlerde tabysty júzege asyryp, Elbasy tapsyrmasyn oryndaý úshin júieli sharalardy qolǵa alýymyz qajet, – dedi Máýlen Áshimbaev.
