Nur Otan partiiasy tóraǵasynyń orynbasary Máýlen Áshimbaev ákimdikterdiń aitqanyna kóne bermeý kerektigin jetkizdi. Sebebi filialdar tikelei partiiaǵa baǵynady jáne jergilikti jerde baqylaý sharalaryn belsendi túrde júrgizýi tiis, dep xabarlaidy QazAqparat tilshisi.
«Máselen, Jaiyq ózenin alaiyq, jeltoqsan aiynan beri balyqtardyń jappai qyrylýy tirkeldi. Qazir osy másele ózekti problemaǵa ainaldy. Balyqtyń biraz bóligi qyrylyp qaldy. Sonyń ishinde qoldan ósirilgen bekire tuqymdas balyqtar da bar. Bul - óte qymbat ónim. Sodan úlken shyǵyn keldi. Partiianyń Atyraý oblystyq filialy bolsa, osy máseleni memlekettik organdarǵa jetkizip, sarapshylardyń kómegimen naqty sebebin izdeýdiń ornyna ortalyqqa «bári jaqsy» dep xat jazyp otyr. Senbilik kezinde bárin tazartyp tastaimyz, deidi. Ondai xat-xabarlardyń qajeti qansha? Máseleni sheshýmen ainalysý kerek. Aimaqta problema bolsa, ony der kezinde kóterip, memlekettik organdarǵa jetkizý kerek», - dedi M.Áshimbaev búgin ortalyq apparatta ótken jiynda. Al aimaqtyq filialdar onlain rejimde balanysqa shyqqan bolatyn.
M.Áshimbaevtyń aitýynsha, «Halyqqa kómek» jobasy aiasynda jergilikti máselelerdi jyldam sheship otyrý qajet. Osy jumysqa qoǵamdyq qabyldaýlar da, arnaiy baqylaý toptary da atsalysatyn bolady. Memlekettik organdar naqty jumysty qolǵa alǵansha monitoring júrgiziledi.
«Atyraýdaǵy jaǵdai anyq bir nárseni kórsetti. Bizdiń filialymyz ortalyqqa anyqtama jazǵannan basqa máseleni der kezinde kótergen joq, onyń sheshilýine de atsalyspady. Al áleýmettik jeliler shýlap jatyr. Memlekettik organdar da ol máseleni talqylap jatyr. Partiianyń filialy bolsa, ortaq sharalarǵa qatyspaǵan. Atyraý filialy, sizder maǵan renjimeńizder. Men qatty aitqan shyǵarmyn. Biraq jergilikti jerde problema bolsa, bizdiń filialdarymyz ún-túnsiz otyrmaýy qajet. Ortalyqtyń buiryǵyn kútpeńizder. Ózderińiz ózekti degen máselelerdi kóterińizder, áleýmettik jeli arqyly jetkizińizder. Biz sonyń bárin aitpasaq, kináli adamdardy jaýapqa tartsyn dep, talap qoimasaq, filialdarynyń qajeti qansha? Bári jaqsy, baqylaýda ustap otyrmyz dep, bizdi jubatýdyń qajeti joq. Sizder ákimdiktiń bir qurylymy emessizder, Elbasy partiiasynyń bir bólshegi bolyp sanalasyzdar. Biz xalyqtyń ál-aýqatyn kóterýge jumys isteýimiz kerek», - dep atap kórsetti M.Áshimbaev.
Osy oraida aldaǵy sý tasqyny máselesin jiti baqylaý qajettigin jetkizdi. Partiia filialdary jergilikti jerde sý tasqynyna qarsy sharalar durys atqarylmasa, ony der kezinde tiisti memlekettik organdarǵa jetkizý kerek.
Aita keteiik, kúni keshe QR Ishki ister ministrligi birneshe 100-ge jýyq eldi mekenniń ákimderine eskertý jasaǵanyn málimdedi. Sebebi atalǵan atqarýshy organdar sý tasqynyna durys jaiyndalyp jatqan joq.
«Máselen, Ishki ister ministrliginiń jergilikti qurylymdary eldi mekenderdiń 88 ákimine eskertý jazyp berdi», - deidi vitse-ministr Iu.Ilin.
