QR Parlamenti Senatynyń tóraǵasy Máýlen Áshimbaev halyq jazýshysy Ábdijámil Nurpeiisovtiń hal-jaǵdaiyn bilý úshin aýrýhanaǵa bardy, dep habarlaidy "Ult aqparat".
«Keshe Qazaqstannyń halyq jazýshysy Ábdijámil Nurpeiisov aǵamyz jatqan aýrýhanaǵa arnaiy baryp, qalamgerdiń kóńilin surap shyqtym. Halin bilip, qasynda biraz áńgimelesip otyrdym. Ábekeńniń densaýlyǵy jaman emes. Degenmen, sońǵy kezde bolǵan qaiǵyly jaǵdai aǵamyzǵa aýyr tigeni anyq. Ajar apamyzdyń jatqan jeri jaryq, topyraǵy torqa bolsyn. Osydan birneshe kún buryn aǵamyz 96 jasqa toldy. Jalpy, Ábdijámil aǵa maǵan qajyr-qairat pen erik-jigerdiń simvolyndai kórinedi. HH ǵasyrda halqymyzdyń basynan nebir qiyndyqtar ótti. Sonyń bári Ábekeńe de az zardabyn tigizgen joq», - dep jazdy ol Facebook-paraqshasynda.
Máýlen Áshimbaev halyq jazýshysynyń soǵys jyldarynda qan maidannyń qaq ortasynda júrgenin, odan keiingi qiyndyqtardy da kórgenin atap ótedi.
«Qaisarlyq pen qajyrlyqtyń ozyq úlgisin kórsetip, ádebietke aianbai eńbek etti. Mádenietimiz ben rýhaniiatymyzǵa ólsheýsiz úles qosty. Qazaq ádebietiniń naǵyz klassigine ainaldy. Keide Ábdijámil aǵaǵa qarap, halqymyzdyń ótken ǵasyrdaǵy shejiresin kórgendei bolamyn. Shyn máninde, Ábekeńniń ózi de, sózi de, jazǵan dúniesi de tarih. Sońyna mol mura qaldyryp, ǵasyrmen, ýaqytpen óz esebin tapqan, qazaq ádebietiniń alyby ári abyzy bolǵan Ábekeńe myqty densaýlyq, amandyq tileimiz. Jasai berińiz, ardaqty Ábe!», - dedi Senat spikeri.
Qazaqstannyń halyq jazýshysy Nurpeiisov Ábdijámil Kárimuly 1924 jyldyń 22 qazanynda Qyzylorda oblysynda dúniege kelgen. 1942 jyly orta mektepti bitirgennen keiin áskerge shaqyrylyp, Ekinshi dúniejúzilik soǵysqa qatysqan. Jazýshy 1946 jyly armiia qatarynda júrip-aq «Kýrliandiia» romanyn jazýǵa kirisken. Eńbegin bitirip baspaǵa bergen soń, bir jyl Qazaq memlekettik ýniversitetinde oqyǵan. 1954 jyly Máskeýdegi M.Gorkii atyndaǵy Ádebiet institýtyna túsip, ony 1956 jyly bitirdi. Tyrnaqaldy kitaby úshin Jambyl atyndaǵy respýblikalyq syilyqtyń iegeri atandy.
XX ǵasyr qazaq ádebietine mol úles qosqan sýretkerlerdiń biri – Ábdijámil Nurpeiisovtiń «Qan men ter» trilogiiasy, basqa da shyǵarmalary otyz shaqty shetel tiline aýdarylyp, ulttyq ádebietimizdi dúniejúzine tanytyp, álem ádebietshileri qasqa-jaisańdarynyń úzdik baǵasyna ie boldy.
«Qan men ter» trilogiiasy orys, frantsýz, ispan, cheh, rýmyn jáne túrik tilderine aýdarylǵan. Tańdamaly ádebi-syn maqalalary «Tolǵaý» (keiinnen «Júregi toly jyr edi») degen atpen qazaq jáne orys tilderinde jeke kitap bolyp shyqqan. 1985 jyly «Aqbidai týraly ańyz» atty ocherkter jinaǵy jaryq kórgen. A.Chehovtyń, M.Gorkiidiń, Nazym Hikmettiń, ispan jazýshysy A.Kesonyń shyǵarmalaryn qazaq tiline aýdarǵan.
«Eńbek Qyzyl Tý», «Qurmet belgisi», Qazaqstan memleketiniń «Otan» ordenimen marapattalǵan. 2019 jyldyń qazanynda QR Prezidentiniń Jarlyǵymen qalamgerge ulttyq ádebietti damytýdaǵy airyqsha eńbegi úshin joǵary dárejeli erekshelik belgisi – «Qazaqstannyń Eńbek Eri» ataǵy berildi.
