«Nur Otan» partiiasynyń muryndyq bolýymen Qaraǵandy, Qyzylorda, Aqtóbe, Pavlodar, Qostanai jáne Soltústik Qazaqstan oblystarynan Arys qalasynyń turǵyndaryna gýmanitarlyq kómek tielgen avtokerýender jolǵa shyqty. Bul týraly «Nur Otan» partiiasy tóraǵasynyń orynbasary Máýlen Áshimbaev Facebook-tegi paraqshasynda jazdy.
«Aityp kelmegen apat Arystaǵy aǵaiynǵa ǵana emes, búkil Alashqa aýyr soqqy bolyp tidi. Áp-sátte ábiger kúige tústik. Biraq baibalamǵa barmai, osy keleńsizdikti ózderiniń jeke maqsattaryna paidalanǵysy keletinderge jol bermeýimiz kerek. Ol úshin árine, qandai jaǵdai bolsa da eldik pen birlikti tý etip áreket etetin ádetimizge salyp, judyryqtai jumylýymyz qajet. Óitkeni «jumyla kótergen júk jeńil». Qazirdiń ózinde elimizdiń barlyq óńirinen Arysqa qarai kómek kerýeniniń lek-legimen aǵylyp jatqanyn kórip otyrmyz. Syn-saǵatta birtutastyqtyń biiginen kórine bilgen halyqtyń bul áreketi kóńil qýantady», - dep jazady Máýlen Áshimbaev.
Onyń atap ótinshe, osy igi iste «Nur Otan» partiiasy da belsendilik tanytyp, kómek jumystaryn júieli túrde júrgizýde. Sonyń nátijesinde alǵashqylardyń biri bolyp keshe «Nur Otan» partiiasynyń Qaraǵandy oblystyq filialy azyq-túlik, kiim-keshek jáne basqa da kerek-jaraqtardan turatyn 10 tonna gýmanitarlyq kómek jiberdi. Partiianyń muryndyq bolýymen Qyzylorda, Aqtóbe, Pavlodar, Qostanai jáne Soltústik Qazaqstan oblystarynan da avtokerýender jolǵa shyqty.
«Sonymen qatar, partiiamyzdyń Aqmola oblystyq filialy Shýchinsk-Býrabai demalys oryndarynda arystyq 100 balanyń demalysyn qamtamasyz etedi. Pavlodar oblysy da jazǵy maýsymda 300 balanyń demalysyna jaǵdai jasaýǵa daiyn. Osyǵan bailanysty balalardyń tizimin jasaqtaý jumystary da bastalyp ketti. Partiia janyndaǵy Balalar quqyǵyn qorǵaý jónindegi respýblikalyq keńestiń ókilderi, sonyń ishinde bilikti psiholog mamandar apat bolǵan óńirge arnaiy baryp, zardap shekken ata-analar men balalarǵa jan-jaqty kómek kórsetýde», - dedi partiia Tóraǵasynyń birinshi orynbasary.
Máýlen Áshimbaev óz jazbasynda jasotandyqtardyń belsendiligin de erekshe atap ótedi.
«Qazirgi tańda «Jas Otan» jastar qanatynyń músheleri aimaqtaǵy eriktilerdiń basyn qosyp, bilek sybanyp áreket etýde. Aldaǵy ýaqytta da partiia tarapynan qolǵa alynǵan aýqymdy jumystar qarqyndy túrde jalǵasady. Keshe Memleket basshysy Qasym-Jomart Kemeluly Toqaev apat bolǵan orynǵa arnaiy baryp, zardap shekken azamattarmen kezdesip, tiisti oryndarǵa naqty tapsyrmalar berdi. Jaǵdai baqylaýda. Sondyqtan Qazaqstan halqy bul synnan da súrinbei ótip, birlik pen berekeniń jarqyn úlgisin kórsetetinine kámil senemin. Partiiamyzdyń barlyq oblystyq filialdarynda gýmanitarlyq kómek qabyldaityn oryndar táýlik boiy jumys istep jatqanyn taǵy bir aityp ótkim keledi. Atalǵan qabyldaý pýnkteriniń mekenjailary myna jerde kórsetilgen, - dedi M.Áshimbaev.
