M.Áýezov atyndaǵy elimizdiń bas qazaq teatry Elbasynyń «Bolashaqqa baǵdar:rýhani jańǵyrý» baǵdarlamasy aiasynda túbimiz bir Túrik eline gastroldik saparmen baryp tabysty oraldy.
Mádeniet jáne sport ministrliginiń jáne M.Áýezov teatry ákimshiliginiń qoldaýymen jalpy túrki álemine ortaq abyz atasy, qobyz atasy Iran-Ǵaiyptyń «Qorqyttyń kóri» qoiylymyn qoiyp, úlken qoshemetke bólenip qaitty.
Bizben suhbat barysynda M.Áýezov teatry bul saparda eki eldiń, jalpy túrki áleminiń arasyndaǵy rýhani bailanysty nyǵaityp, halyqaralyq festivalde qazaq teatry álemdik ozyq deńgeide óner kórsete alǵanyn Qazaqstannyń eńbek sińirgen qairatkeri, teatrymyzdyń akteri Bekjan Turys aityp berdi.
- Elbasymyz, jahandaǵy zamanaýi qazaqstandyq mádeniet jobasyn iske asyrýdy óziniń halyqqa úndeýinde mindettegen bolatyn. Jalpy, mádenietimizdiń ozyq túrlerin álemdik deńgeige kóterilýi, básekege qabiletti halyqaralyq deńgeide qyzmet etý bizdiń teatr úshin de, ult úshin de óte mańyzdy. Mádeniet ulttyń ar-namysy, júregi, bolmysy bolǵandyqtan, bir jyldyń ishinde bizdiń teatr halyqaralyq eki-úsh saparlarǵa shyǵyp óner kórsetti.
Mine, túbimiz bir Túrik eliniń ońtústiginde ornalasqan Adana qalasynda ónerimizdi kórsetip úlken bir qoshemetke bólenip qaittyq. Jalpy eki eldiń, túrki áleminiń arasyndaǵy rýhani bailanysty nyǵaitý barysynda osy sharaǵa bizdiń teatr álemdik ozyq deńgeide óner kórsete aldy dei oilaimyn! - dedi Bekjan Turys.
Túbimiz bir túrki elder bolǵan soń, eki eldiń yntymaǵy táýelsizdik jyldary jyldan jylǵa arta túsýde. Qoiylymda basty rol – Qorqytty somdaǵan Qazaqstannyń eńbek sińirgen qairatkeri Dýlyǵa Aqmolda qoiylym aiaqtalǵan soń, jinalǵan barlyq túrik baýyrlardyń, Adana sahnasynda qoiylymdy tamashalaǵan kórermenderdiń aldynda qazaq halqy eń alǵash egemendigin alǵan kezde, eń birinshi egemendigin tanyp, alǵash ret qoldaý kórsetken túrki halqy ekenin, ony eshqashanda qazaq halqy umytpaitynyn aitty. Qazaq pen Túrik memleketiniń arasyndaǵy dostyq, mádeni bailanystyq sodan beri óziniń jalǵasyn taýyp kele jatqanyn, Ákemteatr ujymy Túrkiia elinde osymenen tórtinshi ret gastroldik saparmen kelip jatqanyn jáne osyndai úlken múmkinshilik týǵyzǵan eki eldiń elshilikterine, mádeniet jáne sport ministrligine alǵysyn bildirdi.
Sapar barysynda túbi bir túrki halyqtaryn jaqyndatý maqsatynda Adana qalasynda teatr festivalinen bólek, kino festivalderde uiymdastyrylatynyn bildik. Olardyń mádeni ómirimen tanysyp, eki el arasyndaǵy barys-kelistiń ómirdiń barlyq salasynda da keńinen qanat jaiyp jatqanyn sezdik. Teatrymyzdyń akteri, Qazaqstannyń eńbek sińirgen qairatkeri Baýyrjan Qaptaǵai jalpy túrki álemine ortaq Qorqyt týraly qoiylymy men akterlarymyzdyń sheberligine túrik aǵaiyndardyń yqylasynan óte joǵary baǵa bergenderin baiqaǵanyn, qazaq teatrynda da osyndai úlken dúnieler bar ekenin dáleldegenin aitty.
- Osynyń aldynda Frantsiia eline baryp keldik. Biraq elden syrtqa shyqqan kezde mindetti túrde teatr ujymynyń aldynda úlken jaýapkershilik bolady. Sebebi mundai halyqaralyq festivalderge kelgennen keiin, júrekte bir serpilister bolady. Spektakl bóten jerde qalai ótedi eken dep oilaisyń. Qudaiǵa shúkir qoiylymdy sátti qoidyq.
Qol shapalaqtaǵandarynan, jyly lebizderinen, qoiylymdy tamashalaǵan adamdardyń júzderindegi kóterińki kóńil kúilerinen shyndyǵynda da qazaq teatrynda da osyndai úlken dúnieler bar eken degen oi túigizdik dep oilaimyn. Burynnan dúnie júzin tań qaldyryp kele jatqan qazaq teatry, sol qalpynan aiyryla qoiǵan joq ekenin dáleldedik. Teatrdyń ártisteri bar kúshterin saldy. Synshylar, teatr direktorlary, lebiz bildirgenderdiń barlyǵy naǵyz teatrdy kórdik dep aityp jatty. Elimizge úlken maqtanyshpen qaittyq, - deidi Baýyrjan Qaptaǵai.
Sapar barysynda M.Áýezov teatry baýyrlas túrki halyqtarynyń rýhani qundylyqtaryn, mádeni bailanysyn odan ári óristetip, mádeni-rýhani tájiribe almasýdy jalǵastyrýda túrki álemine ortaq abyz, qobyz atasy Qorqyt týraly qoiylym arqyly laiyqty úles qosyp qaitqanyn atap ótkimiz keledi.
Túbimiz bir Túrik halqymen qarym-qatynasymyz tarihy tereńinen bastaý alyp, ol bailanys jyl saiyn joǵary deńgeide jalǵasyn taýyp keledi. Túrkiiaǵa jasaǵan saparymyz da sonyń bir aiǵaǵy. Qoryta aitqanda, týys túrik eliniń búgingi tynys-tirshiligimen jaqynyraq tanysyp, mádeni ómirine qanyǵyp, elge kóterińki kóńilmen qaittyq.
Ádilǵazy Baqytuly
