Foto: ru.depositphotos.com
Aqparat jáne qoǵamdyq damý ministri Darhan Qydyráli «Mass-media» týraly jańa zańnyń jobasynda memlekettik tilge qandai basymdyqtar berý usynylyp otyrǵanyn aitty, dep habarlaidy QazAqparat.
«Buǵan deiin baspasóz tili 50/50 qaǵidatymen jumys istegenin bilesizder. Biz ony ózgertip, qazir 70/30 bolsyn dep jatyrmyz. «Mass-media» týraly jańa zań qabyldansa, búkil aqparat, jalpy elimizdiń búkil mass-mediasynyń tili 70 paiyzy qazaqsha bolady», - dedi ministr halyqaralyq «Qazaq tili» qoǵamynyń kezekten tys quryltaiynda.
Vedomstvo basshysy mundai talap Til týraly doktrina jobasyna da usynylǵanyn atap ótti.
«Sonymen qatar qazaq tili týraly doktrina ázirlenip jatyr. Sol doktrinaǵa da engizdik. Osynda vitse-ministr otyr. Til týraly doktrinanyń ishine aqparat salasynda qazaq tiline basymdyq berý týraly usynystar engizdik», - dedi Darhan Qydyráli.
