Máslihat depýtattary biliktiligin arttyrýdan ótedi. Mundai norma búgin Parlamen Májilisiniń jalpy otyrysynda tiisti zań jobasyn talqylaý kezinde aityldy, dep habarlaidy QazAqparat.
Aita keteiik, palata depýtattary «Qazaqstan Respýblikasynyń keibir zańnamalyq aktilerine aýdandyq, qalalyq jáne aýyldyq bilik deńgeileriniń derbestigi men jaýapkershiligin keńeitý máseleleri boiynsha ózgerister men tolyqtyrýlar engizý týraly» zań jobasyn birinshi oqylymda maquldady.
«Endi máslihat depýtattary tiisti biýdjet qarjysy esebinen qaita daiarlyqtan ótýge jáne biliktiligin arttyrýǵa quqyly bolady. Ókiletti organnyń málimetinshe, bul maqsattarǵa 647 mln teńgege tarta qarjy bólinedi. Sonymen birge, zań jobasynda atalǵan normany qalai iske asyrý tetigi eskerilmegen. Osy oraida bul qadamdardy kimder, qalai jáne qandai formatta júzege asyrady?», - dedi depýtat Aigúl Nurkina
Bul rette depýtat atalǵan norma tájiribe júzinde qalai júrgiziletinin surady.
QR Ulttyq ekonomika ministri Áset Erǵalievtiń aitýynsha, oqytý bes jylda bir ret, iaǵni bastapqy eki jylda qamtylady. Bul turǵyda biliktilikti arttyrý memlekettik basqarý akademiiasynyń filialdarynda bolady, sondai-aq 40 akademiialyq saǵat eskeriledi.
Atap aitqanda, zań jobasynda máslihat pen onyń depýtattarynyń mártebesin arttyrý boiynsha birqatar túzetýler qarastyrylǵan. Máslihat sessiiasy tóraǵasynyń qyzmetin taratyp, onyń ókilettigin máslihat hatshysyna berý usynylady. Bul zań jobasy óńirlerdiń derbestigi men jaýapkershilik deńgeiin arttyrýǵa jáne jergilikti mańyzy bar máselelerdi neǵurlym jedel sheshý úshin biýdjettik rásimderdi aitarlyqtai jeńildetýge múmkindik beredi.
