Máskeýge sapary aldynda reseilik basylymdarǵa suhbat bergen Qazaqstannyń ýaqytsha Prezidenti Qasym-Jomart Toqaev eldegi biliktiń aýysýy, Qazaqstan men Resei arasyndaǵy "tyǵyz qarym-qatynas", Eýraziia ekonomikalyq odaǵy (EAEO) men Úlken Eýraziia ideiasy jáne ózge máselelerge toqtalǵan. Ol suhbatynda eldiń Tuńǵysh Prezidenti Nursultan Nazarbaevtyń "kóregen saiasaty" men "kemeńgerligin" jii aityp, maqtaǵan. Reseilik basylymdar maqalalarda basty sýret retinde Nursultan Nazarbaev pen Qasym-Jomart Toqaevtyń birge túsken sýretin qoldanǵan.
Postsovettik elderdiń beseýi múshe - Eýraziia ekonomikalyq odaǵynyń (EAEO) bolashaǵyna toqtalǵan Toqaev bolashaqta odaq músheleri arasyndaǵy qarym-qatynas budan da nyǵaia túsetinin aitqan.
"2025 jylǵa qarai saýda-sattyq salasyndaǵy kedergilerdi joiyp, taýar, qyzmet kórsetý, kapital men jumys kúshiniń shyn mánindegi erkin almasýyn bir-birimizben aqyldasa otyryp, qamtamasyz etemiz dep úmittenemiz. Integratsiia aiasynda qysqa merzimdi jáne orta merzimdi josparlarlardyń bári naqty, ekonomikalyq turǵyda negizdelgen jáne tolyq júzege asyrýǵa bolatyn [jobalar] dep esepteimin" degen ol reseilik Kommersant gazetine.
Regnum.ru saityna bergen suhbatynda Toqaev joǵaryda atalǵan máselelermen qatar Qytaidyń "Bir belbeý - bir jol" jobasynyń Qazaqstan úshin mańyzyn atap ótip, bul joba "memleketimizdiń Batys pen Shyǵys, Soltústik pen Ońtústikti jalǵaityn tranzittik aýmaq retindegi strategiialyq pozitsiiasyn nyǵaitýǵa" kómektesedi dep aitqan.
Toqaev Reseige sapary aldynda memlekettik basylymdarǵa da suhbat bergen. Onda prezident "Nazarbaev təýelsiz eldegi saiasi basqarý men sabaqtastyqtyń múlde jańa, ozyq úlgisin jasap berdi" dep, óziniń de "Prezident retindegi negizgi ustanymy men ómirlik kózqarasy osy baǵyttan aýytqymaitynyn" aitqan.
Qasym-Jomart Toqaev Máskeýge 3 sáýirde Nur-Sultan ýaqytymen tústen keiin barǵan. Bul onyń memleket basshysy retindegi alǵashqy sapary.
