Máskeýdiń burynǵy meri Iýrii Lýjkov 83 jasynda qaitys boldy. Bul aqparatty "Interfaks" jáne RIA "Novosti" agenttikteri habarlady.
Iýrii Lýjkov 1936 jyly Máskeýde týǵan. 1958 jyly Gýbkin atyndaǵy Máskeý munai-himiia jáne gaz ónerkásibi institýtyn injener-mehanik mamandyǵy boiynsha támamdaǵan. 1974 jyldan bastap himiia ónerkásibi ministrliginde qyzmet atqarǵan.
1991 jyly Máskeý merin alǵash sailaǵan kezde qala basshysy Gavriil Popovtyń orynbasary bolyp sailandy. 1991 jyly Boris Eltsindi jaqtap, GKChP-nyń "sátsiz búligine" (pýtch) qarsy belsene áreket etken. 1992 jyly prezident jarlyǵymen qala meri bolyp sailandy.
Ol 2010 jylǵa deiin qala meri bolyp, Reseidegi eń yqpaldy saiasatkerlerdiń birine ainaldy. 1996 jyly ol Eltsinniń qaita sailanýyn qoldady. Sol jyldyń jeltoqsan aiynda Lýjkov bastamasymen federatsiia keńesi Sevastopoldi Resei aýmaǵynyń bir bólshegi dep jariialady. 1999 jyly Lýjkov oppozitsiiaǵa qarai ótip, Evgenii Primakovtyń prezidenttik ambitsiiasyn qoldady.
1999 jyly prezident sailaýynda Vladimir Pýtin jeńip, Iýrii Lýjkov ony qoldady. Biliktiń "Edinaia Rossiia" partiiasyn qurýǵa atsalysty.
Máskeýdi Lýjkov basqaryp turǵan kezde Máskeý jyldam dáýletti qalalar qataryna qosyldy, turǵyndardyń jaǵdaiy jaqsardy. Alaida synshylar ony oppozitsiiany basyp-qýdalady, jemqorlyqtyń qatty óristeýine jol berdi dep aiyptady. Onyń ainalasyndaǵy kóptegen adamdar Reseidegi aýqatty adamdar tizimine engen. Onyń áieli kóp jyldan beri Reseidegi eń bai áielderdiń tiziminde tur.
