Máskeýden taksimen kelgen aqtóbelikterden koronavirýs infektsiiasy anyqtaldy, dep habarlaidy "Ult aqparat".
18 sáýir kúni (saǵat 09.30-daǵy jaǵdai boiynsha) Aqtóbe oblysynda jańadan 2 oqiǵa tirkeldi.
«Búgin eki adamnyń koronavirýs infektsiiasyn juqtyrǵany anyqtaldy. Er adam Reseiden Jaisań shekara beketine deiin taksimen kelgen. Ol indet juqtyrǵan adamnyń janynda otyrǵan. Al indetke shaldyqqan ekinshi adam qala turǵyny bolyp shyqty. Ol da buǵan deiin naýqas adammen bailanysta bolǵan», - dedi oblystyq Taýarlar men kórsetiletin qyzmetterdiń sapasy men qaýipsizdigin baqylaý departamentiniń baspasóz qyzmetinen.
Aita keteiik, keshe keshkilik Aqtóbe qalasynda 26 jáne 22 jastaǵy jigitterden, 75 jastaǵy qariiadan indet anyqtaldy. Sonymen birge shekara beketinde karantindik gospitalde jatqan eki adam virýs juqtyrǵan bolatyn.
«1978 jyly týǵan Aqtóbe oblysynyń azamaty Reseiden poiyzǵa minip, odan soń Jaisań aýylyna deiin taksimen kelgen. Dereý karantindik statsionarǵa jatqyzylyp, analiz alyndy. Al indet juqtyrǵan shekaradaǵy ekinshi adam 1986 jyly týǵan. Er azamat Túrkistan oblysynyń turǵyny. Ol Máskeý qalasynan taksimen kelip, Jaisań aýylyndaǵy karantindik statsionarǵa túsken. Jóteli bolǵasyn provizorlyq statsionarǵa aýystyrylyp, odan KVI-ǵa analiz alyndy. Ol oń nátije kórsetti. Qazirgi tańda dertke shaldyqqan Aqtóbe qalasynyń azamattary oblystyq juqpaly aýrýlar statsionarynyń boks palatasyna, Jaisańdaǵy naýqastar sol jaqtaǵy provizorlyq statsionarǵa jatqyzyldy. Naýqastardyń jaǵdaiy qanaǵattanarlyq. Bekitilgen hattamaǵa sáikes tiisti emdik sharalar júrgizilip jatyr», - dep habarlady baspasóz qyzmetinen.
Naýqastarmen qarym-qatynasta bolǵan adamdar anyqtalyp, barlyǵy meditsinalyq baqylaýǵa alyndy. Aýrý oshaqtarynda epidemiologiialyq zertteý jumystary, dezinfektsiia júrgizildi.
Sońǵy málimetter boiynsha, Aqtóbe oblysynda COVID-19 infektsiiasyn barlyǵy 25 adam juqtyrǵan. Úsh adam dertinen aiyǵyp shyqty.
