Resei astanasynda qazaqtyń dańqty jazýshysy, dramatýrg Rahymjan Otarbaevtyń orys tiline aýdarylǵan eki kitabynyń tusaýy kesildi, dep habarlaidy "Ult aqparat" elshiliktiń baspasóz qyzmetine silteme jasap.
«Shyńǵys-hannyń kóz jasy» jáne «Bas» atty romandary «Hýdojestvennaia literatýra» baspasynyń bas redaktory Vladimir Priahinniń aýdarmasymen orys tilinde jaryq kórdi. Bul sharaǵa máskeýlik jazýshylar, tilshilermen qatar Qazaqstannyń Reseidegi elshiliginiń ókilderi jáne jazýshynyń uly Ermerei Otarbaev qatysty.
Vladimir Priahin jinalǵan qaýymǵa bul jobany Qazaqstan Respýblikasynyń Resei Federatsiiasyndaǵy elshiliginiń qoldaýymen iske asyrǵanyn jetkizip, alǵysyn bildirdi.
Aita ketelik, Otarbaevtyń shyǵarmalary tek qazaq jáne orys tilinde ǵana emes, sonymen qatar frantsýz, qytai, arab, túrik, qyrǵyz jáne aǵylshyn tilderine aýdaryldy.
Óz kezeginde, alǵy sóz alǵan Qazaqstannyń Reseidegi elshiliginiń keńesshi-ýákili Janar Kolbachaeva jazýshynyń mol murasy týraly aitty.
«Bir-birimizdiń ádebi shyǵarmalarymyzben tanysý - ózara túsinistik pen dostyǵymyzdy jaqyndata túsedi. Ózge halyqtyń mádenietimen tanysý - ol adami qundylyqtyń eń joǵary deńgeiindegi bailanys. Rahymjan Otarbaev biraz halyqtyń mádeni qosýshysy, ádebi kópiri bola bildi», - dedi Janar Kolbachaeva.
Is-shara osy keshte jinalǵan Rahymjan Otarbaevtyń dostary, áriptesteriniń jazýshy týraly estelikterimen, jyly lebizderimen jalǵasty. "Oqyrmandy sheshendikke tárbielep, halqymyzdyń asyl muralaryn igerip, rýhani turǵydan dami túsýlerine qyzmet etetin qundy dúnieleri dúiim jurtqa taraidy" degen senim sózderi estildi. Bul joba - jańasha negizde usynylǵan eńbektiń ideialary arqyly táýelsiz elimizdiń jarqyn ádebietin barsha kórkemdikpen shet memleketterdiń oqyrmandaryna tanystyrý jáne qazaq mádenietiniń bolashaǵyna qyzmet etkizý oraiynda jasalǵan.
Rahymjan Otarbaev - Qazaqstan Jazýshylar odaǵynyń múshesi, respýblikalyq Mahambet Ótemisuly atyndaǵy syilyqtyń, Halyqaralyq Aitmatov atyndaǵy syilyqtyń iegeri, Halyqaralyq Aitmatov atyndaǵy akademiianyń akademigi, Halel Dosmuhamedov atyndaǵy Atyraý ýniversitetiniń qurmetti professory, Atyraý oblysy, Qurmanǵazy aýdanynyń Qurmetti azamaty. Qazaqstannyń Eńbek sińirgen qairatkeri.
«Qurmet» jáne «Parasat» ordenderimen marapattalǵan.
